اڈپی12؍اپریل (ایس او نیوز) وزیر ماہی گیری وینکٹ راؤ ناڈگوڈا نے بتایا ہے کہ ’’آئندہ گہرے سمندر میں ماہی گیری کرنے والی کشتیوں میں اِسرو کی طرف سے تجویز کردہ نیوی مسیجنگ ریسیور(این ایم آر) کی تنصیب لازمی طور پر کی جائے گی ۔اور اس مقصد کے لئے بجٹ میں 3کروڑروپے مختص کردئے گئے ہیں۔‘‘

میڈیا کے نمائندوں سے خطاب کرتے ہوئے وزیر موصوف نے کہا کہ ’’ ریاستی حکومت کے پاس ایسا کوئی ثبوت نہیں ہے جس سے یہ بات ثابت ہوسکے کہ لاپتہ سوورنا تریبھوجا نامی ماہی گیر کشتی کی ٹکر بحریہ کے کسی جہاز ہوئی تھی۔لیکن اب پیغام رسانی کانیا این ایم آر سسٹم نصب کیے جانے پر مستقبل میں اس قسم کے حادثات کو یقینی طور پر روکا جاسکے گا۔‘‘انہوں نے مزید کہا کہ ’’ میں نے متاثرہ ماہی گیر خاندانوں سے ملاقات کی ہے۔ انہیں عبوری راحت کے طور پر ایک ایک لاکھ روپے کی امداد فراہم کی گئی ہے۔میں نے مرکزی وزیر داخلہ راج ناتھ سنگھ سے اس مسئلے پربات چیت کے لئے وقت مانگا تھا، لیکن ابھی تک ہمیں ملاقات کے لئے وقت نہیں دیا گیا ہے۔ہم نے گم شدہ کشتی کو ڈھونڈنے کی ہر ممکنہ کوشش کی ہے۔مگر تاحال کہیں سے بھی کوئی سراغ نہیں مل رہا ہے۔‘‘