بھٹکل 17/مئی (ایس او نیوز) بھٹکل سمیت ریاست کرناٹک کے بیشتر حصوں میں آج پہلا روزہ رکھا گیا، شام ہوتے ہوتے یہاں کے بازاروں میں افطاری کی تیاری کے لئے عوام کی کثیر تعداد دیکھی گئی۔ 

رمضان کے مبارک مہینہ میں بالخصوص سموسے بہت زیادہ تعداد میں فروخت ہوتے ہیں، آج پہلے دن بھٹکل بازار میں چھ بجے سے پہلے ہی سموسے ختم ہوچکے تھے، البتہ افطاری کے دیگر ناشتے دستیاب نظر آئے۔ 

کل جمعرات شام کو چینائی سمیت تمل ناڈو کے بیشتر علاقوں میں چاند دیکھے جانے کی اطلاعات کے بعد بھٹکل قاضی صاحبان نے  رمضان کا اعلان کیا تھا، اُدھر پڑوسی ضلع اُڈپی، مینگلور اور پڑوسی ریاست کیرالہ میں کل ہی 30 شعبان مکمل ہوگئے تھے، جس کی بنا پر اُن علاقوں میں بھی رمضان کا اعلان پہلے ہی کردیا گیا تھا۔ بتایا گیا ہے کہ شہر بینگلور میں بھی آج پہلا روزہ رکھا گیا۔

کل شام کو رمضان کا اعلان ہوتے ہی عشاء کی نمازوں میں مسجدیں  نمازیوں سے بھر گئیں، خصوصی نماز تراویح کے لئے بھی لوگوں کی کثیر تعداد مساجد میں نظر آئیں۔ خیال رہے کہ بھٹکل کی قریب 70 مساجد میں بھی حفاظ کرام ہی تراویح پڑھاتے ہیں۔

اس بار بھٹکل میں شدت کی گرمی میں رمضان کا مبارک مہینہ داخل ہوا ہے۔ یہاں سحری کا آخری وقت 4:38 ہے تو افطاری  6:54 ہے۔ اس حساب سے بھٹکل سمیت ساحلی علاقوں میں 14 گھنٹوں سے  بھی زائد  کا لمبا روزہ ہے۔

اُدھر گلف ممالک میں بھی شعبان کے تیس دن مکمل ہونے کی بنا پر ایک روز قبل ہی رمضان کا اعلان ہوگیا تھا، اس مناسبت سے وہاں پر بھی آج پہلا روزہ مکمل ہوا۔