فیفا وڑلڈ کپ؛ کروشیا کو 3 - 0 سے شکست دے کر آرجنٹینا ٹیم فائنل میں داخل
دوحہ قطر 14 ڈسمبر( ایس او نیوز) فیفا ورلڈ کپ کے پہلے سیمی فائنل میں ارجنٹائن نے شاندار کھیل کا مظاہرہ پیش کرتے ہوئے حریف کروشیا کو صفر کے مقابلے تین گول سے شکست دے کر چھٹی مرتبہ ورلڈ کپ فٹبال کے فائنل میں پہنچنے میں کامیاب ہوگیا ہے۔
ارجنٹائن اور کروشیا کے درمیان فیفا ورلڈ کپ کا پہلا سیمی فائنل میچ دوحہ قطر کے لوسیل اسٹیڈیم میں مقامی وقت کے مطابق رات 10 بجے (ہندوستانی وقت کے مطابق رات ساڑھے بارہ بجے) کھیلا گیا۔ ابتداء میں کروشیا نے جارحانہ رخ اپنایا تاہم وہ کوئی گول نہیں بناسکے۔ میچ کی شروعات میں ارجنٹائن دفاعی انداز میں کھیلتا رہا تاہم پندرہ بیس منٹ بعد اس نے اچانک اپنا طرز تبدیل کرتے ہوئے کروشیا کے گول پوسٹ کو نشانہ بنانا شروع کردیا۔
پہلے ہاف کے 30 منٹ بعد کروشیا نے ایک فاؤل کردیا جس پر ارجنٹائن کو پنالٹی کک دے دی گئی۔ ارجنٹائن کے کپتان لیونارڈو میسی نے 34 ویں منٹ میں اسے خوبصورت گول میں تبدیل کرتے ہوئے اپنی ٹیم کو سبقت دلادی۔
اس گول کے صرف پانچ منٹ بعد ارجنٹائن کے کھلاڑی جولیان الواریز نے 39 ویں منٹ میں ایک اور گول بناتے ہوئے ارجنٹائن کو ناقابل تسخیر سبقت دلادی۔ ان کا یہ گول بے حد شاندار اور قابل دید رہا۔
ارجنٹائن کے دو گول ہوتے ہی کروشیا کے کھلاڑیوں کے حوصلے پوری طرح پست ہوگئے اور ان کا کھیل دفاع کرنے تک محدود رہ گیا۔ دوسری طرف ارجنٹائن کے کھلاڑیوں میں مزید گول داغنے کی حرص بڑھتی جارہی تھی۔ پہلا ہاف ختم ہونے پر ارجنٹائن کو صفر کے مقابلے دو گول کی سبقت حاصل تھی۔
دوسرا ہاف شروع ہوا تو ارجنٹائن کے کھیل میں مزید جارحیت نظر آئی جبکہ کروشیا کے کھلاڑی حوصلہ ہارتے نظر آئے۔ میسی نے 69 ویں منٹ میں گیند کو گول پوسٹ تک لاکر ساتھی کھلاڑی کو خوبصورت پاس دیا جسے جولیان الواریز نے گول میں تبدیل کردیا۔
اس کے بعد کروشیا کے کھلاڑیوں کی ہمت پوری طرح ٹوٹ گئی اور آخر تک بھی وہ میچ میں واپس نہیں آسکے۔ انہوں نے گول بنانے کی چند کوششیں کیں تاہم وہ کامیاب نہیں رہیں۔
اس طرح ارجنٹائن نے فیفا ورلڈ کپ 2022 کے پہلے سیمی فائنل میں کروشیا کو صفر کے مقابلے 3 گول سے شکست دے کر ریکارڈ چھٹی مرتبہ فیفا ورلڈ کپ کے فائنل میں رسائی حاصل کرلی جہاں اس کا مقابلہ دوسرے سیمی فائنل کی فاتح ٹیم فرانس یا مراکش سے ہوگا۔
فائنل میچ اتوار کو ہندوستانی وقت کے مطابق رات ساڑھے آٹھ بجے کھیلا جائے گا۔
دوسرا سیمی فائنل آج بدھ رات ساڑھے بارہ بجے مراکش اور فرانس کے درمیان کھیلا جائے گا۔
