بھٹکل 27/جنوری (ایس او نیوز) سپاری کے درخت پر چڑھ کر پھولوں کو  نکالنے کے دوران درخت کٹ ہوکر گرنے سے   ایک کسان  کی موت واقع ہوگئی جس کی شناخت ماروکیری کے رہنے والے   راما تمپا گونڈا (38) کی حیثیت سے کی گئی ہے۔ حادثہ سنیچر رات کو پیش آیا۔

بتایا گیا ہے کہ پوجا پاٹ میں استعمال ہونے والے پھولوں کو توڑنے کے لئے  راما گونڈا ،  مہابلیشور گونڈا کی ملکیت والے باغ میں  موجود  سُپاری  کے  درخت پر چڑھ گیا تھا، درخت پر   وزن زیادہ ہونے کی وجہ سے درخت ہی  کٹ ہوگیا۔ حادثے میں راما کو شدید زخمی حالت میں سرکاری اسپتال لے جایا گیا، ابتدائی طبی امداد کے بعد اُسے   کنداپور اسپتال منتقل کیا جارہا تھا مگر  بتایا گیا ہے کہ تراسی کے قریب  پہنچتے ہی   وہ  زخموں کی تاب نہ کر چل بسا۔

حادثے کے تعلق سے  اس کے قریبی رشتہ دار  مہابلیشور گونڈا نے بھٹکل مضافاتی پولس تھانہ میں معاملہ درج کرلیا ہے۔