وائناڈ، 22؍فروری (ایس او نیوز؍ایجنسی) کانگریس کے سابق صدر راہل گاندھی آج اپنے پارلیمانی حلقہ وائناڈ کے دورے پر ہیں۔ اس دوران راہل گاندھی نے زرعی قوانین کے خلاف احتجاج کرتے ہوئے کسانوں کے ساتھ ٹریکٹر ریلی نکالی۔ اس دوران انہوں نے خود ٹریکٹر چلایا اور کانگریس کے بہت سے رہنما ان کے ٹریکٹر پر بیٹھے۔ اس سے قبل راہل گاندھی نے بھارتیہ جنتا پارٹی اور وزیر اعظم نریندر مودی پر شدید حملہ کیا تھا۔
اس سے قبل راہل گاندھی نے مودی سرکار پر اپنا حملہ جاری رکھتے ہوئے کہا کہ بی جے پی کا خیال طاقتور لوگوں کو مزید بااختیار بنانا ہے، جبکہ ہمارا خیال کمزوروں کو بااختیار بنانا ہے۔ ہم ملک کی ترقی کے لئے سب کو ساتھ لے کر چلنے پر یقین رکھتے ہیں۔ ہم عدم تشدد، مہربانی، گفتگو اور سب کی باتیں سننے پر یقین رکھتے ہیں۔