ایشورپا کے بیٹے کو نہیں ملی بی جے پی کی ٹکٹ؛ بغاوت کا اعلان؛ آزاد اُمیدوار کی حیثیت سے لڑیں گے شیموگہ حلقے سے الیکشن
شیموگہ 16 / مارچ (ایس او نیوز) اپنے بیٹے کو بی جے پی کی ٹکٹ نہ دینے اور یڈی یورپا کے بیتے کو شموگہ کی ٹکٹ دینے پر ناراض بی جے پی کے سینئر لیڈر اور سابق نائب وزیر اعلیٰ ایشورپّا نے اعلان کیا ہے کہ وہ آزاد اُمیدوار کے طور پر شموگہ حلقے سے الیکشن لڑیں گے اور سابق وزیر اعلیٰ ایڈی یورپّا ا کے فرزند بی وائی راگھویندرا کو شکست دیں گے۔
واضح رہے کہ ایشورپّا نے اپنے بیٹے کے ای کنٹیش کے لئے بی جے پی سے ہاویری حلقے کا ٹکٹ مانگا تھا، لیکن ہائی کمان سے ان کی درخواست کو منظوری نہیں ملی ۔ اس پر ایشورپّا نے تلملاہٹ اور ناراضگی کا اظہار کرتے ہوئے شیموگہ حلقے کے موجودہ ایم پی اور آنے والے الیکشن میں بی جے پی کے باضابطہ امیدوار کے خلاف آزاد امیدوار کے طور پر مقابلہ کرنے کا فیصلہ کیا ہے ۔
شہر کے بنجارہ بھون میں اپنے حامیوں کا اجلاس طلب کرکے ایشورپّا نے یہ فیصلہ کیا ۔ اس موقع پر انہوں نے سابق وزیر اعلیٰ ایڈی یورپّا کو صرف اپنے حامیوں کو ٹکٹ دلانے کی مہم کے لئے نشانہ بناتے ہوئے کہا کہ وہ مودی کے خلاف نہیں ہیں ۔ مگر خاندانی اور وراثتی سیاست کے خلاف ہیں ۔ وہ وزیر اعظم نریندر مودی مودی کے کٹر حامی ہیں ۔ مودی ان کے دل میں بستے ہیں مگر ایڈی یورپّا کے دل میں ان کے دو بیٹے اور شوبھا کرندلاجے رہتے ہیں ۔
ایشورپّا نے کہا کہ "میں یہ سب اپنے بیٹے کے لئے نہیں بلکہ ہندوتوا پر یقین رکھنے والے لاکھوں کارکنان کے حق اور مفادات کے لئے کر رہا ہوں ۔ وزیر اعظم نریندرا مودی نے کانگریس کی خاندانی سیاست پر کڑی تنقید کی تھی ۔ میں اس کی حمایت کرتا ہوں ۔ بی جے پی کو ایک خاندان کے کنٹرول میں نہیں رہنا چاہیے ۔ اسے کارکنان کے ہاتھ میں رہنا چاہیے ۔"
