کاروار،30؍اکتوبر (ایس او نیوز)کاروار سٹی میونسپل کاؤنسل (سی ایم سی ) کے لئے صدر اور نائب صدر کا انتخاب یکم نومبر کو منعقد ہونے والا ہے  اور  4جنتادل ایس کےاور2  آزاد اراکین  کی طرف سے ان عہدوں پر بی جے پی امیدواروں کو باہر سے حمایت دینے کا اعلان کیا گیا ہے۔

خیال رہے کہ کاروار سی ایم سی کُل 31اراکین پر مشتمل ہے جس میں اس مرتبہ کانگریس کے 11، بی جے پی 11، جنتادل ایس4اور5آزاد اراکین منتخب ہوئے ہیں۔  اب چونکہ جنتادل کے چاروں اور آزاد میں سے 2اراکین نے حمایت کا اعلان کیا ہے تو پھر دونوں عہدوں پر بی جے پی کے امیدوار وں کی جیت یقینی ہوگئی ہے۔

جنتادل ایس لیڈر آنند اسنوٹیکر نے ایک پریس کانفرنس میں  بی جے پی کوحمایت دینے کا اعلان کرتے ہوئے کہا کہ یہ حمایت ایک سال کی مدت کے لئے آزمائشی طور پر دی جارہی ہے جس کے دوران بی جے پی کو عہدے میں رہتے ہوئے شہر کی ترقی کے لئے ان کے  چار مطالبات میں سے کم ازکم دو مطالبے  پورے کرنے ہونگے۔اُسی صورت میں اس حمایت کو مزید آگے بڑھا یا جائے گا۔ان چار مطالبا ت کے تعلق سے انہوں نے بتایا کہ شہر کے گندے نالوں کی پوری طرح صفائی ہو،شہر میں غریبوں کے لئے کم ازکم 500مکانات  کی تعمیرکو منظوری ملے۔ ضلع کے لئے ایک سوپر اسپیشالٹی اسپتال تعمیر  کیا جائے  اور مالادیوی میدان کی ترقی کے لئے فنڈ منظور کرواتے ہوئے تعمیری کام شروع کیا جائے۔

آنند اسنوٹیکر نے بتایا کہ ’’ مرکز اور ریاست میں بی جے پی برسراقتدار ہے۔ ضلع کے رکن پارلیمان اور ضلع انچارج وزیر دونوں اسی پارٹی سے تعلق رکھتے ہیں۔کاروار کی رکن اسمبلی بھی بی جے پی سے ہے۔ ہم نے سنا ہے کہ سی ایم سی کے لئے ڈاکٹر نتین پیکلے صدارتی امیدوار ہونگے ۔ مجھے امید ہے  کہ ان کی قیادت میں شہر کی ترقی ہوگی۔اس لئے عوامی مفاد کے تعمیری منصوبوں کو پورا کرنے کے سوا اور کسی شرط کے بغیر ہم ان کی حمایت کررہے ہیں۔‘‘

اسنوٹیکرنے ضلع شمالی کینرا کو دو اضلاع میں تقسیم کرنے کے سلسلے میں  کہا کہ:’’ جغرافیائی حیثیت سے شمالی کینرا طویل و عریض ضلع ہے۔ اس کو دو حصوں میں تقسیم کرنے کی میں پوری طرح حمایت کرتا ہوں۔ جب جنوبی کینرا کو تقسیم کرکے اڈپی ضلع بنایا جاچکا ہے  اور اب وہ دونوں اضلاع برابر ترقی  کررہے ہیں اور ایک ہی سکّے کے دو رخ بنے ہوئے ہیں تو اسی انداز میں شمالی کینرا کو بھی دو حصوں میں تقسیم کرنا ہی بہتر ہے۔ بس عوام کو ہر حال میں بنیادی سہولتیں فراہم ہونی چاہیے۔‘‘

پریس کانفرنس کے دوران سی ایم سی کے لئے جے ڈی ایس ا راکین  رُکمینی سدھاکر گوڈا، پریتی مدھوکر جوشی، سنیہا سدانند ماجریکر، راجیش ماجالیکر کے علاوہ آزاد اراکین سندھیا سنجے باڈکر اور منوج باندیکر موجود تھے۔