اتر کنڑا میں انتخابی ضابطہ اخلاق کا نفاذ - چیک پوسٹوں پر تیز ہوئی جانچ پڑتال؛ بورڈس اور ہورڈنگس ہٹائے گئے
کاروار 18 / مارچ (ایس او نیوز) لوک سبھا انتخابات کے لئے ضابطہ اخلاق کے نفاذ کے ساتھ ہی اتر کنڑا کے مختلف مقامات پر چیک پوسٹس پر جانچ پڑتال کی کارروائیاں تیز ہوگئی ہیں ۔ اسی کے ساتھ ہی سڑک کنارے لگائے گئے اشتہاری بینرس اور ہورڈنگس وغیرہ بھی ہٹائے گئے ہیں۔
گوا سے متصل سرحدی علاقے میں کاروار کے ماجالی ، مئیگینی ، بورے کراس، کمٹہ کے ہیرے گُتّی، کتگال، ہوناور کے چنداور، گیروسوپّا، بھٹکل کے سرپن کٹا، کونٹوانی، سرسی کے داسن کوپا، تیگنی، چپگی، سداپور کے چوری کٹے، شیرلگی، یلاپور کے کیروتّی، منڈگوڈ کے سنولّی، باچنکی، اگڈی، جوئڈا کے انموڈ، رام نگر، باپیلی کراس، ہلیال کے ماوین کوپّا، آرلواڈ، کاولواڈ، ڈانڈیلی کے برچی میں چیک پوسٹس لگے ہیں ۔
ان چیک پوسٹوں پر موٹر گاڑیوں اور آنے جانے والے افراد کی جانچ پڑتال کے لئے محکمہ پولیس، آبکاری اور جنگلات کے اہلکاروں کے ساتھ مزید عملے کو شامل کیا گیا ہے ۔ اس کے علاوہ دیگر اضلاع سے جڑنے والے علاقوں میں 8 سے زائد چیک پوسٹس قائم کیے گئے ہیں ۔
ضابطہ اخلاق کے نفاذ کے ساتھ ان تمام چیک پوسٹوں پر مستعدی اور سختی کے ساتھ جانچ کی جا رہی ہے ۔ مختلف محکمہ جات کے افسران کو نوڈل افسران کے طور تعینات کیا گیا ہے اور ان کی نگرانی میں موٹر گاڑیوں کی جانچ کی جاتی ہے ۔ ان چیک پوسٹس پر بالکل جدید طرز کےسی سی ٹی وی کیمرے بھی نصب کیے گئے ہیں ۔
تمام سرحدی علاقوں میں اور خاص طور پر گوا سے جڑے علاقے میں شراب کی اسمگلنگ اور غیر قانونی طور پر رقومات اور ووٹروں کو دینے کے لئے تحفے وغیرہ لانے اور لے جانے کی سرگرمیاں روکنے کے لئے ٹیمیں تعینات کی گئی ہیں ۔
