بنگلورو میں گھریلو جھگڑے کے دوران شوہر نے اپنے ساتھ بیوی اور دو جوان بچوں کوآگ لگادی۔ باپ اور بچے ہلاک۔ بیوی کی حالت سنگین
بنگلورو22/اکتوبر (ایس او نیوز) کاٹن پیٹ پولیس اسٹیشن کے حدود میں گھریلو مسائل کی وجہ سے چل رہے جھگڑے کے دوران یادو مرلی (45سال) نامی ایک باپ نے ہی اپنے دو جوان بچوں اور بیو ی کو آگ لگادی، جس کی وجہ سے مرلی یادو(45سال)، بیٹی کاویری(21سال)اور بیٹے شریکانت (15سال) کی موت واقع ہوگئی ہے، جبکہ مرلی کی بیوی گیتا (42سال) کوبڑی نازک حالت میں وکٹوریہ اسپتال میں داخل کیا گیا ہے۔
موصولہ رپورٹ کے مطابق یادو مرلی بڑھئی (کارپینٹر) کاکام کیا کرتاتھا جبکہ گیتا پھولوں کے گجرے بناکر فروخت کیا کرتی تھی۔بیٹی کاویری نے بی کام تک کی پڑھائی مکمل کی تھی۔ بیٹا شریکانت9 ویں جماعت میں پڑھ رہا تھا۔ مرلی کو شراب پینے کی لت تھی اور وہ نشے میں دھت ہوکر بیوی کے ساتھ ہمیشہ گھریلو جھگڑے کھڑا کیا کرتا تھا، اور خود کام پر جانے کے بجائے بیوی سے پیسے طلب کیاکرتا تھا۔ بتایا جاتا ہے کہ اتوار کے دن بھی اسی مسئلے پر میاں بیوی میں جھگڑا شروع ہوا۔ طیش میں آکراپنے اور بیوی بچوں کے جسم پر پیٹرول چھڑکا اور آگ لگادی۔ گھر سے دھواں نکلتے دیکھ کر پاس پڑوس کے لوگوں نے پولیس کو اطلاع کردی۔ پھر افسران نے جائے وقوع پر پہنچ کر آگ سے جلنے والے چاروں زخمیوں کو وکٹوریہ اسپتال میں منتقل کردیا۔لیکن علاج کارگر نہ ہونے سے دونوں بچے اور باپ نے دم توڑ دیا۔جبکہ گیتا سنگین حالت میں زندگی اور موت کی کشمکش جھیل رہی ہے۔ معلوم ہوا ہے کہ مرلی کا ایک اور بیٹا کارتھک بھی ہے لیکن اس واقعے کے وقت وہ پڑوس کے مکان میں سو رہاتھا اس لئے اس کی جان بچ گئی ہے۔
پولیس کے علاوہ فارنسک ماہرین نے موقع پر پہنچ کر معائنہ کیا۔ کاٹن پیٹ پولیس اسٹیشن میں معاملہ درج کرلیا گیا ہے۔مزید تحقیقات جاری ہے۔