کرناٹک کے کولار میں 22 سالہ اظہار جہیز کی بھینٹ چڑھ گئی
کولار،19؍مارچ(ایس او نیوز)کولار ضلع کے کیالنور کے رہنے والے ایس فیاض کی دوسری بیٹی ایس اظہار(22) کو جہیزکی بھینٹ چڑھادیا گیا۔
اظہارکا نکاح گزشتہ سال31 نومبر کو ہوسکوٹہ تعلقہ کے سولی بیلے گرام پنچایت کی حدود میں آنے والے گڈپنا ہلی کے رہنے والے موز کی منڈی کے مالک29 سالہ شہاب الدین کے ساتھ ہوا تھا۔ شہاب الدین کو جہیز میں نقد رقم سوٹ سونے کی انگوٹھی زیورات فرنیچر سمیت تمام قیمتی چیزیں دی گئی تھیں۔ اظہارکچھ دنوں تک شوہر کے گھر میں خوشی سے رہی، لیکن بعدمیں شہاب الدین اور اس کی ماں یاسمین، باپ بخش،بہن سمیرا اور بہنوی شعیب اور دیگر افراد جہیز کیلئے اسے جسمانی وذہنی اذیتیں دینے لگے۔ اظہارنے کئی مرتبہ میکے آکر شوہر کی فرمائش کو والدین کے سامنے رکھا۔ والدین نے کئی مرتبہ داماد کی فرمائشوں کو پورا کیا۔گزشتہ منگل کی رات اظہارکا قتل کردیا گیا۔
والدین نے سولی بیلے پولیس تھانے میں شکایت درج کی ہے کہ جہیز کی لالچ میں ان بیٹی اظہار کا قتل کردیا گیا ہے۔ اس معاملے میں لڑکی کی ساس یاسمین،سسر بخش،نند سمیرا اور اس کے شوہر شعب یاسمین کی بہن شاہی ماں، دیور نظام اور صدام ذمہ دار ہیں۔
انہوں نے الزام لگایاکہ اس معاملے میں اہم ملزم پنچایت ڈیولپمنٹ افسر (پی ڈی او) جی یس محبوب ذمہ دار ہے۔ گرام پنچایت کے رکن شیخ محمود بابا نے پولیس سے گذارش کی ہے کہ وہ کسی کے دباؤ میں آئے بغیر مذکورہ ملزموں کو فوری گرفتار کرکے اظہارکے والدین کو انصاف دلوائیں۔ پولیس جہیز ہراسانی اورقتل کا معاملہ درج کرکے مفرور ملزموں کو تلاش کررہی ہے۔
