بنگلورو،10/اکتوبر (ایس او نیوز/پریس ریلیز)کانگریس لیڈروں نے اس وقت کی بی جے پی حکومت کی جانب سے ڈی جے ہلی، کے جی ہلی فسادات کے واقعات کی تحقیقات کے لیے مقرر کی گئی کمیٹی کو مکمل طور پر مسترد کردیا تھا۔ کانگریس نے اس کمیٹی پر الزام لگایا تھا کہ بی جے پی نے اس کے سیاسی مفادات پر رپورٹ تیار کرنے کیلئے یہ کمیٹی بنائی تھی۔ لیکن آج سدارامیا کی کانگریس حکومت نے اسی کمیٹی کی رپورٹ کو قبول کرلیا ہے۔ اس ضمن میں ایس ڈی پی آئی کے ریاستی جنرل سکریٹری بی آر بھاسکر پرساد نے بنگلور میں منعقد ایک پریس کانفرنس میں کانگریس حکومت کے سامنے مذکورہ سوالات رکھے اور سوال کیا کہ کانگریس نے اب کس میعار پر اس کمیٹی کی رپورٹ کو قبول کیا ہے جس پر اس نے شک، تنقید اور کھل کر مخالفت کی تھی؟۔
اسمبلی انتخابی مہم کے دوران کانگریس پارٹی نے پلکیشی نگر کے ووٹروں سے وعدہ کیا تھا کہ اگر اس کا امیدوار جیت جاتا ہے تو وہ ڈی جے ہلی اور کے جی ہلی کیسوں میں گرفتار بے قصور مسلم نوجوانوں کو جیل سے رہا کرے گی۔ لیکن ان سب باتوں کو ایک طرف رکھتے ہوئے، اب کانگریس حکومت نے فرقہ پرست بی جے پی حکومت کی جانب سے مسلم کمیونٹی کو دانستہ طور پر پھنسانے کی کوشش کے ایک حصے کے طور پر قائم کردہ انکوائری کمیٹی اور اس کی رپورٹ کو قبول کرکے مسلمانوں کے ساتھ بہت بڑا دھوکہ کیا ہے۔ ایس ڈی پی آئی ریاستی جنر ل سکریٹری بھاسکر پرساد نے الزام لگایا کہ یہ صرف کے جی ہلی اور ڈی جے ہلی کیس تک ہی محدود نہیں ہے، کانگریس پوری ریاست میں مسلم کمیونٹی کو دھوکہ دے رہی ہے۔
پریس کانفرنس سے خطاب کرتے ہوئے ایس ڈی پی آئی کے ایک اور ریاستی جنرل سکریٹری افسر کوڈلی پیٹ نے الزام لگایا کہ کانگریس حکومت مسلمانوں کو دھوکہ دے رہی ہے۔ اس وقت کی فرقہ پرست بی جے پی حکومت نے ہبلی فسادات اور دیگر فسادات میں مسلمانوں کو جان بوجھ کر پھنسایا اور گرفتار کیا۔ جو لوگ فسادات کے دوران علاقے میں موجود نہیں تھے انہیں بھی مقدمات میں پھنسایا گیا ہے اور ان پر یو اے پی اے جیسے سخت قوانین نافذ کیے گئے ہیں۔ اسی میں ایس ڈی پی آئی لیڈر شریف کو بھی پھنسایا گیا ہے۔ کانگریس نے بیدر اور دیگر مقامات پر اسمبلی انتخابات کے دوران وعدہ کیا تھا کہ وہ ایسے معاملات میں بے قصور لوگوں کے خلاف درج مقدمات واپس لے گی۔ لیکن کانگریس آج اپنے وعدے سے پیچھے ہٹ گئی ہے۔ افسر کوڈلی پیٹ نے برہمی کا اظہار کیا کہ اس سے کانگریس پارٹی کی جعلی مسلم محبت ظاہر ہوتی ہے۔پریس کانفرنس میں ریاستی کمیٹی کے رکن مجاہد پاشا، بنگلور شمالی ضلع کے صدر ایڈوکیٹ وسیم احمد اور پارٹی کے ریاستی میڈیا انچارج ریاض کڈا،مبو موجود تھے۔