بھٹکل 12 / (ایس او نیوز) بھٹکل میں ایک دکاندار کو 'ہنی ٹریپ' کا استعمال کرتے ہوئے اپنے جال میں پھنسانے اور لوٹنے کا جو واقعہ سامنے آیا ہے، اس معاملے میں گرفتارملزمین مرتضیٰ اور رضوان کے تعلق سے کچھ نئے انکشافات سامنے آرہے ہیں۔

کہا جا رہا ہے کہ پچھلے کچھ مہینے قبل ان لوگوں نے ایلوڈی کوور گرام پنچایت کے ہوئلمڑی ساحل پر تنہائی میں وقت گزارنے والی ایک پریمی جوڑی کو ڈرانے اور دھمکانے کے ساتھ ان کے زیور وغیرہ لوٹنے کے بعد موبائل میں ان دونوں کی ویڈیو کلپ بھی بنائی تھی اور سوشیل میڈیا پر یہ کلپ وائرل کرنے کی دھمکی دیتے ہوئے انہیں وہاں سے بھگایا تھا۔ اس خبر میں کتنی سچائی ہے، پریمی جوڑی کون تھی اوراس کے بعد کیا کچھ ہوا یہ ساری  تفصیل اور حقائق پولیس تفتیش کے دوران سامنے آنے کی توقع ہے۔ اس کے علاوہ ملزمین کے تعلق سے یہ بات بھی سننے میں آرہی ہے کہ یہ لوگ مویشی چرانے، گانجہ نوشی اور دیگر غیر قانونی سرگرمیوں میں بھی ملوث ہیں۔ معلوم ہوا ہے کہ پولیس کی ٹیم اس پہلو سے بھی  تفتیش کر رہی ہے۔

ہنی ٹریپنگ کے لئے استعمال کی گئی  پورورگا کی ہی رہنے والی مفرور دو عورتوں کو پولیس شدت کے ساتھ تلاش کرنے میں لگی ہوئی ہے۔ تفتیش کے دوران معلوم ہوا ہے کہ ان میں سے ایک عورت کا سسرالی گھر سرسی میں ہے ۔ لیکن اس کی تلاش میں پولیس جب سرسی پہنچی تو وہاں گھر پر تالا لگا تھا اور گھر والے فرار ہوچکے تھے ۔ 

اس معاملے میں ملزم دوسری عورت کے بارے میں پتہ چلا ہے کہ وہ سداپور کے کانسور میں رہتی ہے۔ پولیس کی ٹیم اس عورت کو گرفتار کرنے کے لئے کانسور بھی پہنچی تھی مگر ملزمہ وہاں سے فرار ہو چکی تھی۔ اس عورت کے بارے میں پولیس کو یہ بھی معلوم ہوا ہے وہ اس معاملے کے ایک ملزم کی بہن ہے۔ جس کا مطلب یہ ہوا کہ ملزم  ہنی ٹریپنگ  کے لئے اپنی بہن کو ہی چارہ کے طورپراستعمال کرتا تھا۔

معلوم ہوا ہے کہ پولیس کی تفتیش بڑی سرعت کے ساتھ جاری ہے اور مفرور دونوں عورتوں کی گرفتاری کے بعد ہنی ٹریپنگ اور دیگرغیرقانونی سرگرمیاں انجام دینے والی اس ٹولی کے تعلق سے مزید انکشافات سامنے آنے کی توقع ہے۔