بھٹکل،15/اگست(ایس اونیوز) کمٹہ میں منعقدہ ایک اجلاس کے دوران وہاں کے ایم ایل اے دینکر شیٹی نے صحافیوں کے خلاف بڑے ہی ہتک آمیز انداز میں بات کی تھی۔ اس پر اپنااعتراض اور سخت ردعمل ظاہر کرتے ہوئے ضلع ورکنگ جرنلسٹ ایسوسی ایشن کے جانب سے سرسی میں اسسٹنٹ کمشنر کے توسط سے وزیر اعلیٰ کے نام ایک میمورنڈم پیش کیا گیا۔

میمورنڈم میں کہا گیا ہے کہ کمٹہ کے رکن اسمبلی دینکر شیٹی نے اپنے منصب کے وقار کو بالائے طاق رکھ کر ضلع شمالی کینرا کے صحافیوں کے تعلق سے ایسا ہلکا اور ہتک آمیز تبصرہ کیا ہے جس سے سماج میں صحافیو ں کی شخصیت اور امیج خراب ہوتی ہے۔ جب کہ صحافت کے پیشے سے وابستہ افراد سماج اور انتظامیہ کے اندر موجود ناموافق حالات کے باوجود اپنا فرض منصبی نبھانے میں پوری طرح مشغول ہیں۔اس قسم کے بیانات سے ایک طرف صحافیوں کے وقار اور عزت نفس کو ٹھیس پہنچتی ہے۔ دوسری طرف عوام کو صحافیوں کے تعلق سے ایک غلط پیغام بھی جاتا ہے، جس کی وجہ سے ان کی جان کو خطرہ پیدا ہونے کی بھی نوبت آ سکتی ہے۔

میمورنڈم میں مطالبہ کیا گیا ہے کہ ایک ذمہ دارانہ منصب پر فائز رکن اسمبلی کے بیان کے تعلق سے حکومت کو سنجیدگی سے توجہ دینی چاہیے اور ایسے بیانات پر روک لگانے کے علاوہ صحافیوں کو تحفظ فراہم کرنے کے اقدامات کرنا چاہیے۔

اس موقع پر ضلع شمالی کینرا ورکنگ جرنلسٹ ایسوسی ایشن کے صدر رادھا کرشنا بھٹ، ریاستی کمیٹی کے رکن جی سبرایا بھٹ، ضلع سیکریٹری نرسمہا اڈی، اراکین  کمیٹی کرشنا موتور، گنیش ہیگڈے، یشونت نائک، راجیندرا ہیگڈے، سنتوش، شیو پرساد، راجو، سندیش، روی ہیگڈے، گرو شاستری، مادیو ا نائک اور دیگر صحافی موجود تھے۔