پی یو سی دوم امتحانات ؛ یکم مارچ سے 22 مارچ تک ؛ ڈیجیٹیل واچ اور موبائل پر پابندی؛ ضلع اتر کنڑا سے 14,401 طلبہ ہوں گے شریک
کاروار 28 / فروری (ایس او نیوز) یکم مارچ سے شروع ہونے والے پی یو سی سال دوم کے متحانات میں امسال ضلع شمالی کینرا سے جملہ 14,401 طلبہ شریک ہونگے ۔ ضلع ڈپٹی کمشنر گنگو بائی مانکر نے پی یو سی سے متعلقہ محکمہ تعلیمات کے افسران کے ساتھ میٹنگ میں بتایا کہ ضلع میں 31 امتحانی مراکز قائم کیے گئے ہیں انہوں نے محکمہ تعلیمات پی یو سی کے افسران کو ہدایت دی کہ امتحانات خوش اسلوبی کے ساتھ منعقد کرنے کے لئے تمام ضروری کارروائیاں پوری کرلی جائیں ۔
ڈی سی نے بتایا کہ امتحانات کے دوران کسی بھی قسم کی غیر قانونی بات یا حرکت روکنے کے لئے تمام امتحانی مراکز میں سی سی ٹی وی کیمرے لگائے گئے ہیں ۔ انہوں نے افسران کو ہدایت دی کہ اس بات کو یقینی بنایا جائے کہ طلبہ کے ساتھ ساتھ امتحانی مرکز سے متعلقہ افسران اور اہلکاروں وغیرہ کوبھی ا سمارٹ واچ اور موبائل فون سمیت کسی بھی قسم کی الیکٹرانک اشیاء اپنے ساتھ امتحان گاہ میں نہ لے جائیں۔ اس کی ہرگز اجازت نہیں ہوگی ۔ڈی سی نے اس تعلق سے تمام طلبہ، والدین اور افسران و اہلکاروں کو آگاہ کرنے کی بھی ہدایت دی۔
انہوں نے افسران کو بتایا کہ امتحانی مرکز میں طلبہ کے لئے روشنی، پینے کا پانی، بیت الخلاء وغیرہ جیسی تمام بنیادی سہولتیں دستیاب رہنا چاہیے ۔ اس کے علاوہ دیہی علاقوں سے امتحانی مرکز میں آنے والے طلبہ کے لئے بروقت امتحان گاہ پہنچنے کے لئے بسوں کا مناسب انتظام کیا جائے، اس میں کوتاہی نہیں ہونی چاہیے ۔
ڈی سی نے بتایا کہ سرکاری بسوں میں طلبہ کے لئے ہال ٹکٹ دکھانے پر مفت سفر کرنے کی سہولت دستیاب رہے گی ۔ پرائیویسی کے نطقہ نظر سے میڈیا والوں کو امتحان گاہ کے اندر داخل ہونے اور فوٹو/ویڈیو گرافی کرنے کی اجازت نہیں رہے گی ۔ انہوں نے محکمہ صحت و خاندانی بہبود کے افسران سے کہا کہ طلبہ کی صحت سے متعلق مسائل سے نپٹنے کے لئے امتحان گاہ کے احاطے میں فرسٹ ایڈ کٹ کے ساتھ محکمہ صحت کے عملہ کو تعینات کیا جائے ۔
ڈپٹی کمشنر نے بتایا کہ امتحانی مرکز کے اطراف 200 میٹر تک کے احاطے میں دفعہ 144 نافذ رہے گی اور اطراف میں زیراکس کی تمام دکانیں بند رکھنا لازمی ہوگا ۔ امتحان کی مدت کے دوران طلبہ یا والدین کو الجھن میں ڈالنے والی کسی بھی قسم کی جھوٹی خبریں پھیلانے والوں کے خلاف کارروائی کی جائے گی ۔