آدتیہ ناتھ کی کابینہ سے مستعفی ہوتے ہی سوامی پرساد موریا کے خلاف جاری ہوا گرفتاری وارنٹ؛ سات سال پرانا ہے کیس
سلطان پور12 جنوری (ایس او نیوز) یوگی کابینہ سے استعفیٰ دینے اور بی جے پی کو الوداع کرنے کے ایک ہی دن بعد سوامی پرساد موریا کے خلاف گرفتاری وارنٹ جاری ہوا ہے اور سلطان پور عدالت نے انہیں 24 جنوری تک عدالت میں پیش ہونے کا حکم دیا ہے۔
میڈیا رپورٹس کے مطابق مذہبی جذبات مشتعل کرنے کے ایک سات سال پرانے معاملے میں سوامی پرساد موریا کے خلاف یہ کارروائی ہوئی ہے۔ رپورٹس کے مطابق 2014 میں دیوی دیوتاؤں پر قابل اعتراض تبصرہ کرنے کے معاملے میں موریہ کوبدھ کو عدالت میں حاضر ہونے کے لئے کہا گیا تھا، جب وہ حاضر نہیں ہوئے تو ایڈیشنل چیف مجسٹریٹ (ایم پی/ایم ایل اے عدالت) نے ان کے خلاف گرفتاری کا وارنٹ جاری کیا اور 24 جنوری تک عدالت میں پیش ہونے کا حکم دیا۔
میڈیا میں آئی رپورٹوں کو مانیں تو سوامی پرساد موریا کے خلاف گرفتاری کا یہ نیا وارنٹ نہیں ہے۔ وارنٹ پہلے سے ہی جاری تھا لیکن موریا نے ہائی کورٹ سے 2016 سے اسٹے لے رکھا تھا۔ گزشتہ 6 جنوری کو عدالت نے انہیں 12 جنوری کوعدالت میں حاضر ہونے کے لئے کہا تھا لیکن آج 12 جنوری کو وہ حاضر نہیں ہوئے تو گرفتاری وارنٹ جاری کیا گیا۔