ڈانڈیلی اغوا معاملہ : 2 کروڑ روپے تاوان طلب کرنے والے ملزمین گرفتار ؛ گرفتار شدگان میں بھٹکل کا شخص بھی شامل
ڈانڈیلی 18 / مارچ (ایس او نیوز) ڈانڈیلی کے ایک شخص کا اغوا کرکے اس کی رہائی کے لئے 2 کروڑ روپے طلب کرنے والے ملزمین کو ڈانڈیلی پولیس نے بھٹکل پولس کی مدد سےگرفتار کر لیا ہے جن کی شناخت ڈانڈیلی کے رہنے والے پرشو رام ایلپّا میدار(42)، کالگونڈا تکا رام سرنائک(38)، ہلیال کے رہنے والے ونائیک کمپنّا کرننگ (42) اور بھٹکل مدینہ کالونی کے رہنے والے عبدالحنان محمد جعفر (38)کے طور پر کی گئی ہے ۔ اس معاملے کا ایک اور ملزم ابھی مفرور ہے ۔
پولیس نے ملزمین کے قبضے سے اغوا کے لئے استعمال کی گئی 2 کاریں، پانچ موبائل فون اور 35 ہزار روپے ضبط کیے ہیں ۔
ڈانڈیلی پولیس اسٹیشن میں درج کی گئی شکایت کے مطابق ڈانڈیلی کے بھرت گائیکواڈ کو ملزمین نے منگلورو کرایے پر کار لے جانے کے لئے اپنے ساتھ بلایا تھا اور اس کے بعد کے سی سرکل سے اس کو کار میں اغوا کرکے مار پیٹ کرنے کے بعد اس کے گھر والوں کو فون کرکے اس کی رہائی کے لئے 2 کروڑ روپے تاوان طلب کیا تھا ۔ تاوان ادا نہ کرنے کی صورت میں بھرت کو جان سے مارنے کی دھمکی دی گئی تھی ۔
ڈانڈیلی ٹاون پولیس اور بھٹکل دیہی پولیس نے مستعدی سے کارروائی کرتے ہوئے واردات پیش آنے کے 18 گھنٹے کے اندر اغوا کیے گئے شخص کو بچانے کے ساتھ ملزمین کو گرفتار کرنے میں کامیابی حاصل کی ہے۔
ضلع ایس پی وشنو وردھن، ایڈیشنل ایس پی جئے کمار کے علاوہ ڈانڈیلی ڈی وائی ایس پی شیوانندا مدرکھنڈی کی رہنمائی اور ڈانڈیلی سی پی آئی بھیمنّا ایم سوری کی قیادت میں پی ایس آئی رویندرا برادر، آئی آر گڈیکر و عملہ کے علاوہ بھٹکل دیہی پولیس اسٹیشن کے انسپکٹر چندن گوپال اور ان کی ٹیم نے اغوا شدہ شخص کی رہائی اور ملزمین کی گرفتاری میں حصہ لیا ۔