بنگلورو،4؍اگست(ایس او نیوز) سیاسی لیڈران کے کورونا انفیکشن کی زد میں آنے کا سلسلہ جاری ہے۔ کرناٹک کے وزیر اعلیٰ بی ایس یدی یورپا اور ان کی بیٹی کے کورونا پازیٹو ہونے کی خبروں کے بعد اب ریاست کے سابق وزیر اعلیٰ اور اسمبلی میں اپوزیشن لیڈر سدارمیا کے بھی کورونا پازیٹو ہونے کی خبریں سامنے آئی ہیں۔ اس سلسلے میں سدارمیا نے خود ٹوئٹ کر کے اطلاع دی ہے۔
سدارمیا نے خود کے کورونا انفیکشن میں مبتلا ہونے اور اسپتال میں داخل کیے جانے سے متعلق خبر ٹوئٹ کرتے ہوئے لکھا ہے کہ "کورونا وائرس سے متاثر ہوچکا ہوں اورڈاکٹر کے مشورے پراسپتال میں داخل ہوگیا ہوں۔ مجھ سے رابطے میں آنے والے تمام لوگوں سے درخواست کرتا ہوں کہ وہ اپنا کورونا ٹیسٹ کروائیں اور خود کو کوارنٹائن کرلیں۔"
واضح رہے کہ کورونا نے مرکزی وزیر داخلہ امت شاہ کو بھی اپنے نرغے میں لے لیا ہے اور وہ بھی اسپتال میں داخل ہیں۔ علاوہ ازیں مرکزی وزیر خزانہ پی چدمبرم کے بیٹے و رکن پارلیمنٹ کارتی چدمبرم بھی کورونا کا شکار ہیں۔ ان کا بھی علاج چل رہا ہے اور ملاقات کرنے والوں سے احتیاطاً اپنا کورونا ٹیسٹ کرانے کی بات کہی ہے۔