نیویارک،8؍اپریل (ایس او نیوز؍ایجنسی) یوروپ کے کئی بڑے ممالک سمیت امریکہ میں کورونا کا قہر جاری ہے اور اب اس سے متاثر ہونے والوں کی تعداد 14 لاکھ سے زیادہ ہوگئی ہےجبکہ مرنے والوں کی تعداد 82 ہزار سے تجاوز کرگئی ہے۔ادھر سپر پاور کہے جانے والے ملک امریکہ میں اس وائرس کی وجہ سے حالات بہت خراب ہیں اور وہاں کل سب سے زیادہ ہلاکتیں ہوئی ہیں۔ امریکہ میں آخری اعداد و شمار ملنے تک متاثرین کی تعدادچارلاکھ سے اوپر پہنچ گئی ہے اور وہاں اس وبائی مرض سے ہونے والی اموات کی تعداد 12841 ہوگئی ہے۔
یوروپ میں اٹلی میں ہلاکتوں کو سلسلہ تھمنے کا نام نہیں لے رہا اوراب وہاں ہلاک ہونے والوں کی تعداد 17 ہزار سے اوپر پہنچ گئی ہے اور متاثرین کی تعداد ایک لاکھ 35 ہزار سے زیادہ ہوگئی ہے۔ اسپین میں متاثرین کی تعداد ایک لاکھ 41 ہزارسے زیادہ ہے جبکہ مرنے والوں کی تعداد 14ہزار سےزیادہ ہے۔ادھر فرانس میں اس وائرس سے ہلاک ہونے والوں کی تعداد دس ہزار سے زیادہ ہوگئی ہے اور برطانیہ میں یہ تعداد چھہ ہزار سے تجاوز کرگئی ہے ۔یوروپ کے ملک جرمنی سے آنےوالی خبروں کے مطابق وہاں متاثرین کی تعداد ایک لاکھ سات ہزار سے زیادہ ہے اورمرنے والوں کی دو ہزار کے اوپر ہے۔
چین میں کل 62 نئے معاملہ سامنےآئے اور وہاں ایک دن کسی بھی ہلاکت کی خبر نہیں آنےکے بعد کل دو اموات کی خبر موصول ہوئی ہے۔ایران میں کورونا متاثرین کی تعداد 62ہزار سے تجاوز کر گئی ہے جبکہ وہاں ہلاک ہونے والوں کی تعداد 3872 سے اوپر پہنچ گئی ہے ۔ پاکستان میں متاثرین کی تعداد چار ہزار سے اوپر ہےاور مرنے والوں کی تعداد 57 بتائی جارہی ہے۔سعودی عرب میں متاثرین کی تعدا د 2795 ہے اور وہاں اس سے ابھی تک 41 افراد ہلاک ہوچکے ہیں۔ ہندستان میں اضافہ کارجحان جاری ہے اور حکومت اس سے نمٹنے کے لئے جنگی پیمانہ پر تیاری کر رہی ہے۔