بیلگاوی 15 / دسمبر (ایس او نیوز) شہر کے مضافات میں کانگریسی لیجسلیچرس کی پارٹی کی میٹنگ میں بی جے پی کے اراکین کی شرکت سے سیاسی حلقے میں سرگوشیاں شروع ہوگئی ہیں.
بتایا جاتا ہے کہ بیلگاوی میں چل رہے اسمبلی سیشن کے پس منظر میں کانگریس پارٹی کے لیجسلچرس کے لئے ایک پرائیویٹ ریسارٹ میں خصوصی عشائیہ ترتیب دیا گیا تھا ۔ اس میں بی جے پی کے اراکین اسمبلی شیورام ہیبار اور ایس ٹی سوم شیکھر نے بھی شرکت کی ۔ حزب اختلاف لیڈر آر اشوک کے ساتھ بی جے پی اراکین کا تال میل نہ ہونے کی باتیں ابھی سرخیوں میں ہیں ۔ اس بیچ بی جے پی کے اراکین اسمبلی کا کانگریس کی طرف سے منعقدہ پارٹی میں شرکت کرنا معنی خیز ہوگیا ہے ۔
نائب وزیر اعلیٰ ڈی کے شیو کمار نے کہا " کل رات ہماری پارٹی کے اراکین اسمبلی کی میٹنگ میں بی جے پی کے شیو رام ہیبار اور سوم شیکھر شریک نہیں ہوئے ۔ ہم نے انہیں عشائیہ کے لئے دعوت دی تھی اور اس میں بی جے پی کے ان دو اراکین سمیت دیگر پارٹیوں کے 10 اراکین اسمبلی شریک ہوئے ۔
بی جے پی رکن اسمبلی سوم شیکھر نے وضاحت کرتے ہوئے کہا کہ میں نے کانگریسی اراکین اسمبلی کی میٹنگ میں شرکت نہیں کی ۔ بلکہ نائب وزیر اعلیٰ ڈی کے شیوکمار نے کھانے کی دعوت دی تھی اس لئے ضرور شریک ہوا ۔ اس سے ہٹ کر بی جے پی کے لئے ہزیمت ہونے جیسا کوئی کام میں نے نہیں کیا ۔
کہا جاتا ہے کہ اسمبلی سیشن کے دوران میں بی جے پی کی طرف سے حکومت کے خلاف کیے گئے دھرنے میں بھی یہ لوگ شریک نہیں رہے تھے ۔ مگر اپوزیشن لیڈر آر اشوک نے کہا کہ رکن اسمبلی سوم شیکھر نے مجھے بتایا ہے کہ کانگریسی اراکین کی طرف سے کھانے کی دعوت پر وہ لوگ وہاں پہنچے تھے ۔ اس لئے کوئی ضابطہ کے خلاف سرگرمی نہیں ہوئی ہے ۔ وہ دن میں جو دھرنا ہوا تھا اس میں بھی شامل تھے ۔ پھر بھی میں انہیں طلب کرکے بات کروں گا ۔
کانگریسی اراکین اسمبلی کی میٹنگ کی صدارت کرتے ہوئے وزیر اعلیٰ سدا رامیا نے کہا کہ آنے والے پارلیمانی انتخاب کے لئے ابھی سے ضروری تیاریاں کر لیں ۔ ریاستی حکومت کی طرف سے گارنٹیوں کی جو اسکیمیں لاگو کی گئی ہیں اس کی تشہیر گرام پنچایت سطح پر منعقدہ عوامی اجلاس کے اندر ہونی چاہیے ۔
اراکین اسمبلی کی میٹنگ میں پریانک کھرگے ، ایم بی پاٹل، شرن پرکاش پاٹل، ضمیر احمد خان، ستیش جارکیہولی، شرن بسپّا سمیت کئی وزراء غیر حاضر رہے جس پر وزیر اعلیٰ سدارامیا نے اپنی ناراضگی ظاہر کی ۔ وزراء اور اراکین اسمبلی کے بیچ تال میل بنانے کے لئے یہ میٹنگ منعقد کی گئی ہے اور اس میں وزراء ہی اگر غیر حاضر رہیں گے تو کیسا رہے گا ؟
یتنال نے اپنی ہی پارٹی کو بنایا نشانہ: بیلگاوی میں چل رہے سرمائی اجلاس کے دوران بی جے پی رکن اسمبلی بسن گوڈا یتنال نے اپنی پارٹی کے خلاف نشانہ سادھا اور پارٹی میں چل رہے طور طریقے پر اپنی بے اطمینانی کا اظہار کیا ۔
انہوں نے کہا کہ ہماری پارٹی کے کچھ لوگ نئی دہلی جا کر ہاتھ پاوں پکڑتے ہوئے اپنا کام کروا لیتے ہیں ۔ لیکن مجھے اس کی عادت نہیں ہے ۔ اس لئے میں وزیر نہیں بن سکا ۔ بی جے پی نے جب مجھے وزیر ہی نہیں بنایا تو پھر مجھے وزیر اعلیٰ کہاں سے بنائیں گے ۔