اجتماعی جدو جہد کے ذریعہ بی جے پی کو شکست دینے کھرگے کی اپیل
کلبرگی، 5؍دسمبر(ایس او نیوز) قائد اپوزیشن راجیہ سبھا ممتاز کانگریسی قائد و سابق مرکزی وزیر ڈاکٹر ملیکارجن کھرگے نے کانگریسی کارکنان سے اپیل کی ہے ک وہ اپنی اجتماعی کوشش و جدو جہد کے ذریعہ کرناٹک قانون ساز کونسل کے انتخابات میں کانگریس کے امیدوار مسٹرشیوانند پال کو کامیاب کریں اور بی جے پی کے دولت مند امیدوار مسٹر بی جی پاٹل کو شکست دیں۔ انھوں نے کہا کہ اگر ہم متحد ہوکر کام کریں تو مخالف امیدوار کتنا بھی دولت مند اور طاقت ور کیوں نہ ہو اسے پسپائی کا سامنا کرنا پڑے گا۔ انھوں نے کہا کہ اگر آپ کانگریس کی تاریخ پر نظر ڈالیں گے تو معلوم ہوگا کہ کانگریس نے بشمول بی جے پی دوسری پارٹیوں کے دولت مند افراد کے مقابلہ میں ہمیشہ اپنی پارٹی کے عام کارکنان کو ہی اپنا امیدوار نامزد کیا ہے۔ انھوں نے کہا کہ ہمارے متحد ہوکر کام کرنے سے ہی ہمارے امیدوار کامیاب ہوتے رہے ہیں۔مسٹر کھرگے جئے بھوانی فنکشن ہال گلبرگہ میں جمعہ کے دن کانگریس کے ایک جلسہ سے خطاب کررہے تھے۔
بی جے پر تنقید کرتے ہوئے مسٹر کھرگے نے کہا کہ بی جے پی نے ہمیشہ تقسیم اور پھوٹ کی سیاست پر عمل کیا ہے۔ جب کہ ان کی پارٹی کانگریس نے جمہوریت کے اصولوں پر یقین رکھتے ہوئے ان اصولوں پر ہی عمل کیا ہے۔ انھوں نے بتایا کہ میں نے گزشتہ باراپنے پارلیمانی انتخاب میں اپنی نشست سے محرومی اختیار کرلی کیوں کہ میں اپنی پارٹی کی آئیڈیالوجی کے خلاف مفاہمت اختیار نہیں کرسکتا۔ انھوں نے بتایا کہ بحیثیت رکن پارلیمینٹ و مرکزی وزیر جب وہ اقتدار پر تھے تو انھوں نے دس برسوں تک کئی ایک انقلابی اقدامات کئے جن میں مہاتما گاندھی دیہیروز گار گیارنٹی ایکٹ کا نفاذ، اور حصول تعلیم کا حق شامل ہیں۔ لیکن اس کے برخلاف بی جے پی اب تمام ترقیاتی اقدامات کو الٹا رہی ہے۔ انھوں نے سوال کیا کہ کیا ہم اس بی جے پی کو ووٹ دیں جس کے سبب ضروری اشیاء پٹرول، ڈیزل، پکوان گیاس وغیرہ کی قیمتیں آج آسمان کو چھو رہی ہیں۔ سابق وزیر شرن پرکاش پاٹل، سابق ایم ایل سی بی آر پاٹل اوور کانگریسی امیدوار شیوانند پاٹل اور سابق ایم ایل سی الم پربھو پاٹل نے بھی اس موقع پر خطاب کیا۔