حیدرآباد، 18/اپریل (ایس او نیوز /ایجنسی)   تلنگانہ کے وزیراعلیٰ  ریونت ریڈی نے سنسنی خیز تبصرہ کرتے ہوئے کہا  ہے کہ ہر مرتبہ مودی الیکٹرانک ووٹنگ مشینوں( ای وی ایمس )کے ذریعہ انتخابات میں کامیابی حاصل کرتے ہیں اور جب تک ای وی ایم کےذریعے انتخابات  کا سلسلہ بند نہیں کیا جائے گا،  بی جے پی نہیں ہار سکتی۔

اخبارنویسوں سے گفتگو کرتے ہوئے  ریڈی نے  کہا کہ یہ بات مجھے کہنے کی ضرورت نہیں ہے،    بی جے پی کے لیڈران  خود  پارلیمنٹ کے سنٹرل ہال میں یہ بات کہتے ہیں کہ نریندرمودی اورای وی ایم جتنے دن رہیں گے کانگریس کو حکومت ملنے والی نہیں ہے۔ ریڈی کے اس بیان   کے بعد  سیاسی حلقوں میں ای وی ایم کے خلاف جاری مہم کو تقویت حاصل ہوگئی ہے۔

ریونت ریڈی نے  پوچھا کہ مودی، ای وی ایم ہٹانے کو ہٹانے کے لئے تیار کیوں نہیں ہے ؟  ای وی ایم سے ان کا کیا رشتہ ہے؟ ای وی ایم ہٹانے سے  ان کو  کیوں تکلیف ہورہی ہے؟ بی جے پی بیلٹ  پیپر پر انتخابات لڑنا کیوں نہیں چاہتی، حالانکہ  پوری دنیا میں بیلٹ پیپر پر انتخابات ہورہے ہیں، صرف ہندوستان میں ہی ای وی ایم کا استعمال کیا جارہا ہے۔ انہوں نے کہا کہ اگر کوئی تجربہ کیا جاتا ہے اورتجربہ ناکام ہوتا ہے تو پھر اس کو چھوڑدینا چاہئے۔

ریونت ریڈی نے کہا کہ ای وی ایم پر سے عوام کے ساتھ  ہمارا بھروسہ بھی ختم ہوگیا ہے۔ صرف بی جے پی کو ہی ای وی ایم پر بھروسہ ہے، کیونکہ اُنہیں معلوم ہے کہ بیلٹ پیپر سے انتخابات ہوں گے تو  وہ کبھی جیت ہی نہیں سکتے۔ انہوں نے الیکشن کمشنر پر زور دیا کہ صرف بی جے پی کے چاہنے سے  ای وی ایم کے ذریعے الیکشن نہیں ہونا چاہئے اور   بی جے پی کا بھروسہ ملک کے لئے کافی نہیں ہے۔ ریڈی نے کہا کہ  ملک میں عوامی حکومت ہے تو  عوام کا  بھروسہ ضروری ہے۔ اسی لئے عوام جیساچاہتے ہیں، اسی کے مطابق انتخابات ہونے چاہئے۔