کُمٹہ 23 فروری (ایس او نیوز) شمالی کینرا میں کمٹہ کے قریب ہندوستانی سمندری حدود میں چین سے تعلق رکھنے والا ایک بحری جہاز موجود ہونے کا پتہ چلنے کے بعد ہندوستانی کوسٹ گارڈ کو ہائی الرٹ پر رکھا گیا ہے ۔ 

    پتہ چلا ہے کہ یہ بحری جہاز کمٹہ کے قریب گہرے سمندر کے پانیوں میں پایا گیا تھا، جس سے شبہ پیدا ہوتا ہے کہ یہ جاسوسی کی سرگرمیوں میں مصروف ہو سکتا ہے، خاص طور پر کاروار میں سی برڈ بحری اڈے کو نشانہ  پر رکھتے ہوئے جاسوسی کارروائی ہونے کا شک کیا جا رہا ہے ۔ 

    فی الحال کوسٹ گارڈ اور کوسٹل پولیس فورس دونوں اس معاملے کی تحقیقات کر رہے ہیں ۔ چینی جہاز کی موجودگی کی ابتدائی اطلاع ان ماہی گیروں سے ملی جو کمٹہ سے گہرے سمندر میں ماہی گیری کے لیے روانہ ہوئے تھے ۔
 
    پتہ چلا ہے کہ یہ کشتی چین کی فوہوا بندرگاہ پر رجسٹرڈ ہے ۔ کمٹہ پولیس اسٹیشن کے انسپکٹر وکٹر نائمن اس معاملے کی تحقیقاتی ٹیم  کی قیادت کررہے ہیں جس میں کوسٹل سیکیورٹی پولیس (سی ایس پی) کی ایک ٹیم بھی شامل ہے ۔ تحقیقاتی ٹیم ان ماہی گیروں سے مزید معلومات اکٹھی کر رہی ہے جنہوں نے سمندر میں چینی جہاز کو دیکھا تھا ۔ معلوم ہوا ہے کہ ماہی گیر کشتیوں پر سوار عملہ نے چینی جہاز کی ویڈیو فوٹیج بھی بنائی ہے۔

  شبہ ہے کہ ہندوستانی دفاعی دستوں کو چکمہ دے کر چینی کشتی ہندوستانی پانیوں میں داخل ہوئی ہو گی جس کا پتہ لگانے میں نگراں دستے ناکام رہے ہیں ۔ اس سے یہ خدشہ پیدا ہوا ہے کہ چینی جہاز پر موجود افراد ہندوستان میں اسٹریٹجک بحری اڈوں کو نشانہ بناتے ہوئے جاسوسی کی سرگرمیاں انجام دے رہے ہونگے ۔  اس معاملے کو سنجیدگی سے لیتے ہوئے اس کے تمام پہلووں کو نظر میں  رکھ کر جانچ جاری  کی جارہی ہے۔