بنگلورو،27؍اکتوبر(ایس او نیوز) شہر بنگلورو میں موسلادھار بارش اور نشیبی علاقوں کے زیر آب آجانے کے بعد اب ایک بار پھر شہر میں بڑے نالوں پر ہونے والی غیر قانونی تعمیرات کا معاملہ سرخیوں میں آگیا ہے اور حکومت نے طے کیا ہے کہ بڑے نالوں کے اوپر غیر قانونی تعمیرات کو ہٹانے کے لئے فور ی طورپر نوٹس جاری کیا جائے اور جس کسی نے بھی بڑے نالوں کی زمین پر تعمیرات کھڑی کی ہیں اس کے ساتھ مروت کئے بغیر ان تعمیرات کو ہٹانے کے لئے نوٹس جاری کیا جائے۔

ا س سلسلہ میں بی بی ایم پی کی طرف سے جو اتبدائی رپورٹ حکومت کو دی گئی ہے اس کے مطابق بڑے نالوں پر نجی تعمیرات کی وجہ سے بارش کا پانی بہہ نہ سکا اور اس کے نتیجے میں کئی نشیبی علاقوں میں واقع مکانات میں پانی گھس آیا۔اس رپورٹ کا جائزہ لینے کے بعد وزیر اعلیٰ بی ایس ایڈی یورپا نے کہاہے کہ بڑے نالوں پر جو شاپنگ کامپلکس، اپارٹمنٹ اور مکانات وغیرہ کی تعمیر کی جا چکی ہے فور اً ان کو وہاں سے ہٹانے کے لئے حکامات صادر کئے جائیں۔

انہوں نے کہا ہے کہ بڑے نالوں پر تمام تعمیرات کوغیر قانونی تعمیرات کے زمرے میں کافی پہلے ہی لایا جا چکا ے اس کے باوجود ان کو ہٹانے کے لئے اب تک کارروائی نہیں کی گئی ہے۔ اس اب بلا تاخیر ان تعمیرات کو منہدم کرنے نالوں سے بارش کے پانی کی نکاسی کے لئے انتظامات کئے جائیں۔

بتایا جاتا ہے کہ وزیر اعلیٰ نے بارش سے متاثرہ علاقوں کا دور ہ کرنے کے بعد متاثرین میں فی خاندان 25ہزار روپے کی رقم دینے کا اعلان کیا ان میں سے 100سے زیادہ وہ مکین ہیں جنہوں نے بڑے نالے کو بند کرکے مکانات بنوالئے ہیں۔ وزیر اعلیٰ نے بی بی ایم پی کے اڈمنسٹریٹر گورو گپتا وار کمشنر منجوناتھ پرساد کو ہدایت دی ہے کہ فوری طور پر نالو ں پرغیر قانونی تعمیرات کھڑی کرنے والوں کو نوٹس جاری کر کے ان تعمیرات کو ہٹانے کے لئے ضروری قدم اٹھائیں۔

وزیر اعلیٰ کی اس ہدایت کے بعد بی بی ایم پی کے افسروں نے طے کیا ہے کہ اگلے ہفتہ ان غیر قانونی تعمیرات کو ہٹانے کے لئے نوٹس جاری کیا جائے۔ وزیر اعلیٰ کی ہدایت کے فوری بعد سے شہر کے ان علاقوں میں جہاں نالوں پر تعمیرات کر لی گئی ہیں بی بی ایم پی نے نوٹس جاری کرنے کی پوری تیاری کرلی ہے۔