بنگلورو:16؍ جنوری (ایس اؤ نیوز) ہرسال یوم جمہوریہ کی تقریب میں ریاستوں کی نمائندگی کرنےوالی نمائش  کا اہتمام ہوتاہے۔ اس مرتبہ  ریاست کیرلا کی جانب سےبھیجے گئے انقلابی شخصیت ، سماجی مصلح شری نارائن گرو مجسمہ کو نمائش میں شامل کرنے سے مرکزی حکومت نے انکار کیاہے۔ اس طرح  مرکزی حکومت نے بھارت کی تاریخی  اور  اہم انقلابی شخصیت کی بے عزتی  کی ہے۔ ساتھ ساتھ ظلم و استحصال ، خواتین کی عدم مساوات اور  ذات پات کو ترغیب دینے کا کام کر رہی ہے۔ اس بات کا الزام  کانگریس کے سنئیر لیڈر اور ودھان پریشد کے رکن بی کے ہری پرساد نے لگایا ہے۔ انہوں  نے شری نارائن گرو کے مجسمے کو نمائش پر لگانے سے انکارکرنے  پر مرکزی حکومت کی سخت تنقید کی ۔ایک طرف بنگلور میں اخبار نویسوں سے گفتگو کرتے ہوئے  بی کے ہری پرساد نے مرکزی حکومت سے ملک کے عوام سے معافی مانگنے کا مطالبہ کیا تو وہیں دوسری طرف مینگلور میں  سابق وزیر  بی رماناتھ رائے نے بھی مرکزی حکومت کے اس اقدام کی مذمت کرتے ہوئے   شری نارائن گرو کے مجسمے کو یوم جمہوریہ کی نمائش میں شامل کرنےسے انکار کو پورے پسماندہ ہندوسماج کی بے عزتی قرار دیا ہے۔

دونوں کانگریسی لیڈران نے  الزام لگایا کہ قومی شاعر رابندرناتھ ٹیگور ، مہاتماگاندھی اور بھارتی دستور دینے والے ڈاکٹر بی آر امبیڈکرسے اعزاز پانے والی شخصیت شری نارائن گرو کا سنگھ پریوار سے کنٹرول کیا جاناقابل مذمت ہے ۔

یوم جمہوریہ کےموقع پر دہلی میں ہونے والی ریلی میں ملک کی ثقافتی، مذہبی ، تاریخی ، ترقی اور ملٹری قوت کی نمائش کرنےو الےمجسمے شامل ہوتےہیں۔ اسی طرح ریاستیں بھی اپنی ریاست کی اہمیت  کو اُجاگر کرنے کےلئے مجسموں کو نمائش میں شامل کراتے ہیں۔ اسی مناسبت سے ریاست کیرلا کے  انقلابی سماجی مصلح شری نارائن گرو کے مجسمے کو بھی پیش کیا گیا تھا لیکن حکومت نے ان کا مجسمہ لگانے سے انکار کیا جس پر  بی کے ہری پرساد اور بی رماناتھ رائے  سخت تنقید کی ہے۔  

بی کے ہری پرساد نے بتایا کہ نارائن گرو کیرلا سے تعلق رکھتےہیں جس  کے تاریخی ثبوت بھی موجود ہیں۔ نارائن گرو کے تعلق سے سینکڑوں دستاویزات موجود ہیں جس میں  دیکھا جاسکتا ہے کہ انہوں نے  صدیوں پہلے  سماجی سطح پر کس طرح اصلاحاتی کام کئے ہیں۔ ہری پرساد کے مطابق  ظلم و استحصال، ذات پات، عدم مساوات اور نچلی ذات والوں کی بے عزتی کے خلاف جدوجہد کرتےہوئے انہوں نے  ایک ذات، ایک طبقہ  اور ایک بھگوان کا پیغام دیاتھا۔ ہری پرساد نے بتایا کہ نارائن گرو نے زندگی بھر معاشرےمیں مساوات کے لئےکاوشیں کی تھیں۔ ان کے انقلابی اقدامات کی ستائش کرتےہوئے مہاتما گاندھی نے ان کی حمایت کی تھی۔ اسی طرح رابندر ناتھ ٹیگوراور ڈاکٹر امبیڈکر نے نارائن گرو کو عزت بخشی تھی۔ لیکن آج کی سنگھ پریوار کنڑول والی مرکزی حکومت نے نارائن گروکے مجسمے کا قبول کرنے سے انکارکرکے  ان کی بے عزتی ہے۔