بھٹکل میں ساحل آن لائن کے زیر اہتمام کیرئیر گائیڈنس پروگرام؛ ماہرین تعلیم کی طرف سے طلبہ کومفید ہدایات
بھٹکل 18 فروری (ایس او نیوز)نیوز پورٹل ساحل آن لائن کی طرف سے شہر کے بلال ہال میں SSLC اور PUC طلباء کے لیے کیریئر گائیڈنس کیمپ کا انعقاد کیا گیا جس میں ماہرین تعلیم نے طلباء سے خطاب کرتے ہوئے ان کی بہترین انداز میں رہنمائی کی۔
بنگلورسے تعلق رکھنے والے معروف ماہر تعلیم سید تنویراحمد نے کہا کہ ایس ایس ایل سی اور پی یو سی؛ طالب علموں کے لئے چوراہے کی طرح ہوتے ہیں، اس وجہ سے آپ کے پاس کئی آپشنس ہیں ۔ آپ سائنس، کامرس یا آرٹس ڈپارٹمنٹس کے علاوہ بہت سے نئے کورس میں داخلہ لے سکتے ہیں ۔ اگر ہم نے اپنے مقصد کو صحیح سمت میں نہیں رکھا اور درست انتخاب نہیں کیا تو گمراہ ہونے کا خدشہ ہے ۔ لہٰذا طالب علم کو پہلے سے ایک ہدف طے کرنا چاہیے کہ وہ کیا کرنا چاہتا ہے اور اسے کس میدان کی طرف آگے بڑھنا ہے۔
انہوں نے والدین سے کہا کہ وہ دوسرے بچوں کے سامنے اپنے بچوں کوکوسنا چھوڑ دیں کیونکہ آج ہر طالب علم باصلاحیت ہے اورطلبہ صحیح راستے کا انتخاب کرکے اپنے کیریئر میں کامیابی حاصل کرسکتے ہیں ۔
پروگرام کی صدارت کرتے ہوئے بھٹکل جامع مسجد کے امام اور خطیب مولانا عبدالعلیم خطیبی ندوی نے طلبہ سے خطاب کرتے ہوئے کہا کہ وہ اپنے ہر کام کا ٹائم ٹیبل بنائے اور اُسی کےمطابق کام کرے، طالب علم کو کبھی فٹبال نہیں بننا چاہئے کہ کوئی اُسے ایک طرف مارے تو دوسرا دوسری طرف مارے، اُسے ایسا نہیں ہونا چاہئے کہ وہ اپنے دوستوں کے بلانے پر اِدھر سے اُدھر چلنا پڑے۔ مولانا نے طلبہ کوکافی مفید مشوروں سے نوازا۔ اس موقع پر ساحل آن لائن کے ڈائریکٹر جاوید حُسین ارمار نے بھی اپنے خیالات کا اظہار کیا۔ امین ذُھیب دامودی کی تلاوت کلام پاک سے پروگرام کا آغاز ہوا، طالب علم انس ہلّارے نے نعت پاک سنائی، ساحل آن لائن کے کنڑا نیوز ایڈیٹرمحمد رضامانوی نےاستقبال کرتے ہوئے مہمانوں کا مختصر تعارف پیش کیا، پروفیسر رؤف احمد ساونور نے ساحل آن لائن کا مختصر تعارف پیش کیا ۔ اسٹاف مُبشر حُسین ہلارے نے شکریہ ادا کیا ۔ مصعب عابدہ نے پروگرام کی نظامت کی ۔ساحل آن لائن کے مینیجنگ ایڈیٹر عنایت اللہ گوائی بھی ڈائس پر موجود تھے ۔ پروگرام میں بھٹکل کے ہائی اسکولوں اور کالجس کے طلبہ کے ساتھ ساتھ مرڈیشور اور منکی کے طلبہ و طالبات نے بھی حصہ لیا۔
