ہاویری، 12/ مارچ (ایس او نیوز) مشہور بیادگی مرچوں کی قیمت میں اچانک بھاری گراوٹ آنے سے ناراض ہاویری کے کسانوں نے ہنگامہ مچایا جس کے دوران اے پی ایم سی مارکیٹ کے اندر گھس کر توڑ پھوڑ اور پتھراو کی وارداتیں انجام دی گئیں ۔
    
معلوم ہوا ہے کہ جیسے ہی بیادگی مرچوں کی قیمت 20 ہزار روپے فی کوئنٹل سے گر کر 8 ہزار روپے فی کوئنٹل پر آنے کا اعلان کیا گیا، کسانوں نے اے پی ایم سی مارکیٹ میں پتھراو شروع کیا ۔ پارک کی گئی گاڑیوں کو آگ لگائی گئی، جس کی وجہ سے اے پی ایم سی اسٹاف کی دو کاریں اور دس  موٹر بائکس جل کر خاکستر ہوگئیں ۔ دفتر کے اندر گھس کر کھڑکیوں کے شیشوں اور فرنیچر کو توڑ پھوڑ کر رکھ دیا گیا ۔ 
    
مشتعل کسانوں نے افسران کے خلاف ناراضگی کا اظہار کیا اور نعرے بازی کرتے ہوئے آگ بجھانے کے لئے آنے والی فائر سروس کے عملے کو احاطے میں گھسنے سے روکا ۔ ایک مرحلے پر احتجاجیوں نے پولیس کو بھی پیچھا کرکے بھگا دیا ۔ 
    
حالات پر قابو رکھنے کے لئے مزید پولیس فورس طلب کر لی گئی ہے ۔ پولیس اس معاملے کی تحقیقات کر رہی ہے ۔