لکھنؤ،16؍اپریل(ایس او نیوز؍یواین آئی) اترپردیش کے فتح پور سیکری پارلیمانی حلقے سے بہوجن سماج پارٹی کے امیدوار بھاگون شرما عرف گڈو پنڈت نے اپنے حریف و کانگریس کے ریاستی صدر راج ببر کو یو پی کی گلیوں میں چپلوں سے پٹائی کی دھمکی دی ہے۔ سوشیل میڈیا پر وائرل ایک ویڈیو کے مطابق گڈو پنڈت راج ببر اور ان کے حامیوں پر بی ایس پی کے خلاف افواہ پھیلانے کا الزام لگاتے ہوئے یو پی کی گلیوں میں چپلوں سے ان کی پٹائی کرنے کی دھمکی دیتے نظر آرہے ہیں۔طیش زدہ پنڈت نے غیر پارلیمانی زبان کا استعمال کرتے ہوئے گنگا کی قسم کھائی ہے اور ان کے حامیوں کو بے رحمی سے پیٹنے کی بھی دھمکی دی ہے۔دو بار ایم ایل اے رہ چکے پنڈت کو بی ایس پی نے آخر وقت میں راجیو سنگھ کا ٹکٹ کاٹ کر فتح پور سیکری سے اپنا امیدوار بنایا ہے ۔قابل ذکر ہے کہ ابھی کل ہی الیکشن کمیشن نے قابل اعتراض بیانات دینے والے اور انتخابی ضابطہ اخلاق کی خلاف ورزی کرنے کے پاداش میں اترپردیش کے وزیر اعلیٰ یوگی آدتیہ ناتھ اور سماج وادی لیڈر اعظم خان کے خلاف72؍گھنٹوں اور بی ایس پی سپریمو مایاوتی و بی جے پی امیدوار و مرکزی وزیر مینکا گاندھی کے خلاف48؍گھنٹوں تک کسی بھی انتخابی سرگرمی سے دوررہنے کی پابندی عائد کی ہے۔