بنگلورو،17/ اکتوبر (ایس او  نیوز/ایجنسی ) وزیر اعلیٰ سدارامیا نے بی جے پی کے ان الزامات کو بے بنیاد قرار دیا کہ کانگریس حکومت ریاست میں کنٹراکٹروں سے رقم وصول رہی ہے تا کہ اس کا استعمال پانچ ریاستوں کے اسمبلی انتخابات میں کر سکے۔

اخباری نمائندوں سے بات کرتے ہوئے سدارامیا نے کہا کہ بی جے پی کہ یہ الزامات سیاسی بدنیتی پرمبنی ہیں اور ان کو بنیاد بنا کر بی جے پی اگر احتجاج بھی کرتی ہے تو عوام اس پر کوئی توجہ نہیں دیں گے۔ انہوں نے کہا کہ محکمہ انکم ٹیکس نے اس کو جو اطلاع دی گئی اس کی بنیاد پر اپنا کام کر دیا ہے اب اس کو بنیاد بنا کر سیاسی الزام تراشی درست نہیں۔ انہوں نے کہا کہ بی جے پی جو چاہے کر لے عوام اس پر بھروسہ کرنے والے نہیں ہیں۔ بی جے پی کا احتجاج محض سیاسی مقصد کو ذہن میں رکھ کر ہے، عوامی مفاد سے اسے کچھ لینا دینا نہیں۔ انہوں نے کہا کہ کسی اور ریاست میں ہونے والے انتخابات کو ریاستی حکومت یا کانگریس سے جوڑنے کی کوشش قابل مذمت ہے۔ انہوں نے کہا کہ ریاستی حکومت کی طرف سے اس معاملے کی کسی ایجنسی یا کمیشن سے جانچ کروانے کی کوئی ضرورت نہیں ہے۔

بی جے پی کے سابق رکن اسمبلی سی ٹی روی کے اس بیان پر کہ کرناٹک میں کانگریس حکومت سے کہا گیا ہے کہ وہ پانچ ریاستوں میں انتخابات کے لئے فنڈنگ کا انتظام کرے۔ سدارامیا نے کہا کہ سی ٹی روی نے ہمیشہ سے جھوٹ ہی کہا ہے ان کے اس جھوٹ پر توجہ دینے یا اس کا جواب دینے کی کوئی ضرورت نہیں ہے۔

ریاست کے دیہی علاقوں میں بجلی کی سپلائی میں رکاوٹ کی خبروں سے متعلق ایک سوال پر وزیر اعلیٰ نے کہا کہ سابقہ حکومت نے ریاست میں بجلی کی پیداوار میں ایک میگاواٹ کا بھی اضافہ نہیں کیا ۔ بارش کی قلت کے سبب بجلی سے چلنے والے پمپ سیٹ پوری طرح سوکھ کر خراب ہو چکے ہیں ۔ انہوں نے کہا کہ ریاست میں بجلی کی کھپت میں اضافہ ہوا ہے اس کی وجہ سے ترسیل میں 2000 میگاواٹ بجلی کی کمی واقع ہوئی ہے۔