ریاستی حکومت پرہرکام کیلئے40فیصدکمیشن خوری کاالزام ، بی جے پی حکومت کوبرخاست کرنے گورنرکوخط لکھوں گا:سدارامیا
میسورو،21؍نومبر(ایس او نیوز) اپوزیشن لیڈر سدارامیا نے کہا کہ میں نے کبھی ایسی حکومت نہیں دیکھی جس کو اتنا بڑا کمیشن ملا ہو۔موجودہ ریاستی بی جے پی حکومت کمیشن خوری میں گھاگ بن گئی ہے۔بروز جمعہ شہر میں اپنی رہائش گاہ پر صحافیوں سے گفتگو کرتے ہوئے سدارامیانے کہاکہ ریاستی کنٹراکٹرز اسوسی ایشن نے وزیر اعظم کو خط لکھا ہے جس میں ریاستی حکومت پر الزام لگایا کہ ہر کام کے ٹینڈر کے لئے40 فیصد کمیشن ادا کرنا پڑتا ہے۔ اس مکتوب میں کس کس شعبہ میں کتناپرسنٹیج ہے بیان کیا گیا ہے۔ محکمہ تعمیرات عامہ، آبی وسائل، شہری ترقیات اور دیہی ترقیات سمیت کس کس محکمے میں کتناکمیشن لیاجارہاہے عوام طور پرمیڈیاکے سامنے بیان کیا گیا۔اگرمیں یہ الزامات لگاتا توحکومت یہ کہتے ہوئے نظراندازکرتی کہ اپوزیشن کواس کے علاوہ کوئی اورکام نہیں ہے، لیکن یہاں ٹینڈرلینے والے خودالزام لگارہے ہیں۔ایسی صورتحال میں ریاستی حکومت آگے نہیں بڑھ سکتی۔ وزیر اعظم نریندر مودی یہ کہتے رہے کہ نہ کھاؤں گانہ کھانے دوں گا۔ میں نے اپنی سیاسی زندگی میں کبھی ایسی حکومت نہیں دیکھی جو اتنا بڑا کمیشن حاصل کرتی ہو۔ سدارامیا نے کہاکہ میں ریاستی حکومت کو برخاست کرنے کے لئے فوری طور پر گورنر کو خط لکھوں گا۔