نئی دہلی، 18/اپریل (ایس او نیوز /ایجنسی)  سپریم کورٹ میں EVM-VVPAT معاملے کی سماعت جاری ہے۔ جسٹس سنجیو کھنہ اور جسٹس دیپانکر دتہ کی بنچ کیس کی سماعت کر رہی ہے۔

سپریم کورٹ نے پوچھا کہ کیا پروگرام میموری میں کوئی چھیڑ چھاڑ ہو سکتی ہے؟ اس پر الیکشن کمیشن نے کہا کہ اسے تبدیل نہیں کیا جا سکتا، یہ ایک فرم ویئر ہے، جو سافٹ ویئر اور ہارڈ ویئر کے درمیان ہوتا ہے۔

 اسے بالکل تبدیل نہیں کیا جا سکتا۔ پہلے بے ترتیب طور پر (رینڈم لی) ای وی ایم کا انتخاب کرنے کے بعد، مشینیں اسمبلی کے اسٹرانگ روم میں جاتی ہیں اور سیاسی پارٹیوں کی موجودگی میں بند کردی جاتی ہیں۔

سپریم کورٹ نے پوچھا کہ جب آپ ای وی ایم بھیجتے ہیں تو کیا امیدواروں کو ٹیسٹ کرنے کی اجازت ہے؟ اس پر الیکشن کمیشن نے کہا کہ مشینوں کو اسٹرانگ روم میں رکھنے سے پہلے فرضی پول کرایا جاتا ہے۔ امیدواروں کو بے ترتیب مشینیں لینے اور ان کی جانچ کے لیے پول کرنے کی اجازت ہے۔

ایڈوکیٹ نظام پاشا نے درخواست گزاروں کی طرف سے دلائل دیتے ہوئے کہا کہ ایسا نظام ہونا چاہیے کہ ووٹر خود اپنی VVPAT سلپ بیلٹ باکس میں ڈالے۔ جسٹس کھنہ نے سوال کیا کہ کیا اس سے ووٹر کے رازداری کے حق پر اثر پڑے گا؟

اس پر وکیل نظام پاشا نے دلائل دیتے ہوئے کہا کہ ووٹر کا ووٹ کا حق اس کی پرائیویسی سے زیادہ اہم ہے۔ اس پر سنجے ہیگڑے کی جانب سے کہا گیا کہ الیکشن کمیشن کا یہ بیان کہ تمام پرچیوں کے میچ ہونے کی صورت میں اسے 12-13 دن لگیں گے، غلط ہے۔

وکیل پرشانت بھوشن نے کیرالا کے لیے اخبار میں شائع خبر کا حوالہ دیتے ہوئے کہا کہ فرضی ای وی ایم کے دوران بی جے پی کے حق میں ایک اضافی ووٹ ڈالا جا رہا ہے۔ اس پر عدالت نے الیکشن کمیشن سے تصدیق کرنے کو کہا۔ اسوسی ایشن فار ڈیموکریٹک ریفارمس (ADR) کے وکیل پرشانت بھوشن نے کہا کہ VVPAT مشین کی روشنی 7 سیکنڈ تک جلتی ہے، اگر وہ روشنی ہر وقت جلتی رہے تو ووٹر پورا کام دیکھ سکتا ہے۔

سپریم کورٹ نے الیکشن کمیشن سے EVM-VVPAT کے کام کے بارے میں جانکاری مانگی ہے۔ پارلیمانی قائمہ کمیٹی کی رپورٹ پر بھی وضاحت طلب کر لی ہے۔ سپریم کورٹ نے الیکشن کمیشن کے وکیل منیندر سنگھ سے پوچھا کہ ای وی ایم کے ساتھ چھیڑ چھاڑ نہ ہونے کو یقینی بنانے کے لیے آپ کی طرف سے کیا طریقہ کار اپنایا جا رہا ہے؟

درخواست گزاروں کی جانب سے پارلیمانی قائمہ کمیٹی کی رپورٹ کا بھی حوالہ دیا گیا ہے۔ اس پر اپنا موقف واضح کریں۔ ساتھ ہی سپریم کورٹ نے کہا کہ انتخابی عمل کا اپنا وقار ہے، کسی کو یہ خدشہ نہیں ہونا چاہیے کہ اس کے لیے ضروری اقدامات نہیں کیے گئے۔

سپریم کورٹ میں ای وی ایم سے متعلق معلومات دیتے ہوئے الیکشن کمیشن کے اہلکار نے عدالت کو بتایا کہ ای وی ایم سسٹم میں تین یونٹ ہیں، بیلٹ یونٹ، کنٹرول یونٹ اور تیسرا وی وی پی اے ٹی۔ کنٹرول یونٹ ڈیٹا کو ذخیرہ کرتا ہے اور وی وی پی اے ٹی تصدیق کے لیے ہے کہ ووٹر نے جس نشان کو ووٹ دیا، وہ درست ہے یا نہیں۔ یہ صرف ووٹر دیکھ سکتا ہے۔

 الیکشن کمیشن کے اہلکار نے کہا کہ کنٹرول یونٹ VVPAT کو پرنٹ کرنے کا حکم دیتا ہے۔ یہ ووٹر کو سات سیکنڈ تک نظر آتا ہے اور پھر ایک سلپ VVPAT کے سیل بند باکس میں گر جاتی ہے جس پر پارٹی کا انتخابی نشان چھپا ہوتا ہے۔

ہر کنٹرول یونٹ میں 4 ایم بی میموری ہوتی ہے۔ کمیشننگ کا عمل ووٹنگ سے 4 دن پہلے ہوتا ہے اور تمام امیدواروں کی موجودگی میں اس عمل کی جانچ پڑتال کی جاتی ہے اور انجینئرز بھی موجود ہوتے ہیں۔