منگلورو سائی مندر کے پاس بی جے پی کی تشہیر - بھکتوں نے جتایا اعتراض
منگلورو 19 / اپریل (ایس او نیوز) شہر کے اوروا میں چیلمبی سائی مندر کے پاس رام نومی کے موقع پر جب بی جے پی والوں نے پارلیمانی انتخاب کی تشہیر شروع کی تو وہاں پر موجود سیکڑوں بھکتوں نے اس کے خلاف آواز اٹھائی جس کے بعد بی جے پی اور کانگریسی کارکنان کے علاوہ عام بھکتوں کے درمیان زبانی جھڑپ ہوئی ۔
مندر کے ٹرسٹی وشواس داس نے انتخابی تشہیر روکنے کی ہدایت دیتے ہوئے کہا کہ کسی بھی پارٹی کو مندر کے احاطے میں تشہیری مہم چلانے کی اجازت نہیں دی گئی ہے ۔ جب بھکتوں اور بی جے پی کارکنان کے درمیان زبانی تکرار تیز ہوگئی تو ایم ایل اے ویدویاس کامت اور کانگریسی لیڈر متھن رائے نے مداخلت کرتے ہوئے حالات کو پرامن بنانے کی کوشش کی ۔ اسی دوران حالات کو قابو میں رکھنے کے لئے پولیس کو طلب کر لیا گیا جس نے موقع پر پہنچ کر متصادم گروہوں کو منتشر کر دیا ۔