بھٹکل :8؍ جنوری  (ایس اؤ نیوز ) انجمن گرلس انگلش میڈیم ہائی اسکول ، نوائط کالونی کی جانب سےہرسال اسکول کی ہونہار طالبات کو ’دخترانجمن‘ گولڈ میڈل کے اعزاز سے نوازا جاتا ہے، اس بار یعنی 2023-24 کا یہ ایوارڈ دسویں میں زیر تعلیم ہونہار طالبہ میمونہ عجائب بنت محمد امین عجائب نے حاصل کیا ہے۔ جبکہ گزشتہ سال یعنی 2022-23 کا دختر انجمن کا باوقار گولڈ میڈل ایوارڈ مفلیحہ بنت اسحاق رکن الدین اور ضحہ بنت فہیم ایس ایم نے حاصل کیا ہے 

7جنوری 2024بروز اتوار کو منعقدہ ہائی اسکول کے سالانہ جلسے میں سال 2023-24کے رنرس آپ یعنی سلور میڈل عائشہ رینان بنت محمد انصار شوپا اور  فاطمہ سیرہ بنت عبدالعظیم گنگاولی کو اور سال 2022-23کی رنرس آپ ماریہ بنت مصدق علی اکبرا اور فاطمہ سمہا بنت مجیب ایس ایم نے حاصل کیاہے۔

سالانہ جلسے میں پبلک ہیلتھ میں ماسٹر ڈگری یافتہ اور اقرأ اسپتال اینڈ ریسرچ سنٹر کیرلا کی ریسرچ انٹرن محترمہ فاطمہ عرفا نے مہمان خصوصی کےطور پر اپنے خیالات کا اظہار کرتےہوئے لڑکیوں سے کہاکہ حجاب کے متعلق تذبذب میں مبتلا نہ ہوں بلکہ اس کو اپنا ایک شعار سمجھتے ہوئے حجاب کے ساتھ تعلیم کو جاری رکھیں اور ترقی کی راہیں طئے کرتےہوئے منزل پر پہنچیں، انہوں نے کہا کہ آپ اگر چاہیں تو سب کچھ ممکن ہے اور ہر قسم کی دشواریوں کو دور کیا جاسکتاہے۔ تعلیم کی بنیادی اہمیت کو اجاگر کرتے ہوئے انہوں نے طالبات کو دقیانوسی تصورات سے باہر نکلنے پرزور دیا۔ اعزازی مہمان کے طورپر شریک انجمن گرلس ہائی اسکول بستی روڈ کی معلمہ شری کلپنا این تلگیری نے امتحانات کی تیاری اور امتحانی خوف سے باہر نکلنے کے طریقوں پرروشنی ڈالی۔ انجمن لیڈیز اڈوائزری کمیٹی کی ممبر محترمہ سیما قاسمجی نے جلسے کی صدارت کی۔

سالانہ جلسے کا آغاز طالبہ زینب برماور کی تلاوت قرآن سے ہوا۔ طالبہ زینب قاضیا نے نعت پیش کی۔ طالبہ شمائلہ اور ان کی ساتھیوں نے انجمن کا ترانہ پیش کیا۔ محترمہ سمیرہ نے استقبال کیا اسکول کی صدر مدرسہ صبا دامدا نے سالانہ رپورٹ کی خواندگی کی۔ محترمہ زینب شیخ نے شکریہ کلمات اداکئے۔ ڈائس پر انجمن پی یوکالج کی پرنسپل محترمہ ڈاکٹر فرزانہ فرح محتشم ، نائب پرنسپل محترمہ طالعہ معلم، محترمہ  عطیہ اے جی اور محترمہ صادقہ قاضیاوغیرہ موجود تھیں۔