بھٹکل :8؍ جنوری  (ایس اؤ نیوز ) تعلقہ کے بینگرے گرام پنچایت حدود کے پڈوشرالی میں ایم ایس آئی ایل کی شراب دکان شروع کئے جانے کے متعلق بینگرے پنچایت میں اعتراض والی شکایت داخل کی گئی ہے۔ جس کے دوران پڈوشرالی حدود کے عوام نے وزیر منکال وئیدیا سے ملاقات کرتےہوئے ایم ایس آئی ایل کی دکان نہ کھولنےکی مانگ کی۔

وزیر وئیدیا سے ملاقات کے دوران وہاں موجود عورتوں نے بات کرتےہوئے کہاکہ پڈوشرالی کو جانے والی سڑک سے متصل ہی اسکول اور عبادت گاہیں ہیں اور متعلقہ روڈ سے ہی عورتوں کا روزانہ آناجانا ہوتا ہے۔ ایسے علاقے میں شراب کی دکان مناسب نہیں ہے۔ سال 2017میں بھی یہاں شراب دکان کھولنے کی کوشش کی گئی تھی تو ہمارے احتجاج کی وجہ سے اس کو رد کیاگیا تھا۔ اب دوبارہ پھرایک بار وہیں شراب دکان کھولنےکی تیاری کی جارہی ہے۔ ہم دیہی عوام اور خاص کر عورتیں وزیر موصوف سے مطالبہ کرتےہیں کہ وہ اس کو منظوری نہ دیں۔

اپنا مطالبہ پیش کرنے کے تھوڑی دیربعد دوبارہ عورتیں وزیر موصوف کے پاس پہنچ کر اونچی آواز میں کہاکہ شراب دکان کی جو منظوری دی گئی ہے وہ صحیح نہیں ہے ۔ تو وزیرمنکال وئیدیا نے بیزارگی کا اظہار کرتےہوئے کہاکہ میں آپ کے مطالبات سن چکا ہوں۔ اب پھر کسی کے اکسانے پر اس طرح کی حرکت اچھی نہیں ہے۔ وزیر نےعورتوں سے مخاطب ہوکر کہاکہ منظوری کے کیا معنی ہیں،  اگر کہاجارہاہےکہ انہیں منظوری دی گئی ہے تو پھر وہ دکان شروع کریں گے جانے دیجئے۔ کہتے ہوئے وزیر چلنے لگے توکچھ دیر کے لئے ماحول پیچیدگی کا شکار ہوگیااور عورتیں ہنگامہ پروری پر اتر آئیں تو شرالی اور پڈوشرالی کے چند لوگ عورتوں کو روک کرکہاکہ وزیر صاحب نےکہاہے کہ وہ اس سلسلےمیں جانچ کرکے کارروائی کرنےکاتیقن دے چکے ہیں۔ اس کے باوجود ان کے ساتھ توتو میں میں کرنا مناسب نہیں ہے ۔ تب عورتیں خاموش ہوکر لوٹ گئیں۔

وزیر وئیدیا کا تیقن : وزیر منکال وئیدیا نے اس سلسلے میں کہاکہ ایم ایس آئی ایل دکان کی منظوری کے متعلق مجھے جانکاری نہیں ہے، البتہ اخبارات میں رپورٹ دیکھی ہے۔ انہوں نے یقین دلایا کہ وہ اس سلسلےمیں تفتیش کرتےہوئے کارروائی کریں گے۔