بھٹکل:8/ نومبر (ایس اؤنیوز) ایک سال پہلے مرکزی حکومت کی طرف سے لئے گئے اچانک نوٹ بندی کے فیصلے سے ملک کی معیشت بربادی کے کگار پر ہے۔ مرکزی حکومت کا یہ فیصلہ متناقض، متضاد اور عوام مخالف ہے اس لئے اس معاملے میں  صدر ہندکو چاہئے کہ وہ  مداخلت کرے، ان باتوں کا مطالبہ لے کر بھٹکل بلاک کانگریس نے بدھ کو’’یوم سیاہ ‘‘مناتے ہوئے اسسٹنٹ کمشنر ایم این منجوناتھ کے توسط سے صدر ہند کو میمورنڈم سونپا۔

میمورنڈ م میں کہا گیا ہے کہ نوٹ بندی کی وجہ سے ملک میں بد انتظامی اور انتثار پھیلا ہے۔عوام آج بھی اس کے برے اثرات بھگت رہے ہیں۔ اس دوران جو انسانی ہلاکتیں ہوئیں قابل تشویش ہیں۔کانگریس نے مطالبہ کیا کہ  متاثرین کے درمیان معاوضہ تقسیم کیا جائے۔

احتجاجیوں سے خطاب کرتے ہوئے بلاک کانگریس صد ر وٹھل نائک نے کہاکہ ریزرو بینک کی رپورٹ کے مطابق 99فی صد رقم بینک میں جمع ہوچکی ہےتو کالا دھن کہاں گیا وزیراعظم عوام کو جواب دیں۔ جی ڈی پی کی سطح زوال کی طرف ہے، ملک ترقی کے لحاظ سے 15سال پیچھے ہوگیا ہے ، جس کے نتیجے میں پورا ملک ابترحالات سے دوچارہے، عوامی مسائل کے لئے وزیر اعظم بہرے ہونے کا انہوں نے الزام لگایا۔

سنئیر کانگریس لیڈر راما موگیر نے خطاب کرتے ہوئے کہاکہ نوٹ بندی کی وجہ سے ماہی گیر، دیہات کے غریب عوام جن مشکلات کا سامنا کررہے ہیں وہ بیان سے باہر ہے۔ تجارت، لین دین ، چھوٹے موٹے بیوپار سب کے لئے پریشانی کا باعث بنا ہواہے، وزیرا عظم عوام کی تکالیف کا مزہ اڑاتے ہوئے گھوم رہے ہیں، بی جے پی کے سنئیر لیڈران بھی  وزیر اعظم کی مطلق العنانی رویہ کی مذمت کررہے ہیں، نریندر مود ی کی وجہ سے ملک کے برے دن آگئے ہیں۔ اس موقع پر تعلقہ پنچایت صدر ایشورنائک ، اسٹانڈنگ کمیٹی چیرمن وشنو دیواڑیگا، ممبر مہابلیشور نائک، جالی پنچایت کے صدر عبدالرحیم شیخ، ضلع پنچایت ممبر سندھو بھاسکرنائک، سید علی ،شرالی پنچایت کے صدر وینکٹیش نائک، گوپال نائک، بائیلور پنچایت کے صدر منجوناتھ نائک، ماوین کوروے پنچایت کی صدر کوسوما نائک، این این کھاروی ، سدھاکر نائک وغیرہ موجود تھے۔