بھٹکل  :26/اکتوبر(ایس او نیوز) بھٹکل پی ایل ڈی بینک صدر کے خلاف پیش کی گئی عدم اعتماد تحریک کا ہنگامہ رکنے کا نام نہیں لے رہاہے۔ بینک ڈائرکٹروں کے دوگرہوں کے درمیان جاری آپسی چپقلش اور رسہ کشی نے عوامی سطح پرماحول کو گرما دیا ہے ۔ حالات کے پیش نظر ہائی کورٹ نے اپناحکم امتناعی رد کردیا ہے اور بدھ کو حکم صادر کیا ہے کہ عدم اعتماد تحریک کی کارروائی کو جلد مکمل کیا جائے۔ خیال رہے کہ اس سے قبل ہائی کورٹ نےبینک صدر سنیل نائک کے حق میں چھ ہفتوں کا اسٹے دیا تھا۔ 

بینک ڈائرکٹر ایشو رنائک کے وکیل ناگ پرسنا نے بدھ کو عدالت میں حکم امتناعی کو رد کرنے کے متعلق اپنا دعویٰ پیش کیا ، اور عدالت کو بتایا کہ جنہوں نے عدالت سے حکم امتناعی لایا ہے انہو ں نے اس سے قبل عدالت سے جاری حکم نامے کی اطلاع عدالت کو نہیں دی ہے۔ صدر اپنا اعتماد کھوچکے ہیں، جس کی بنا پر گذشتہ تین مہینوں سے بینک کے نظام کو چلانا ممکن نہیں ہو پارہاہے، وکیل نے دعویٰ پیش کیا کہ انتخابات کا اعلان ہونے کے بعد عدالت کا مداخلت کرتے ہوئے حکم امتناعی جاری کرنا صحیح نہیں ہے۔ ذرائع سے ملی اطلاع کے مطابق دعویٰ کی مخالفت کرتے ہوئے بینک صدر سنیل نائک کے وکیل ایس کے آچار نے عدالت کو بتایا کہ چند ڈائرکٹروں نےبینک کے صدر کے خلاف اپنے اختیارات کا غلط استعمال کرنے اور مطلق العنانی رویہ کی مذمت میں عدم اعتماد تحریک پیش کرنے کی بات کہی ہے ، لیکن ان الزامات کی تائید میں کوئی شواہد پیش نہیں کئے ہیں۔

اس موقع پر عدالت میں موجود ایڈیشنل اڈوکیٹ جنرل پوننا نے محکمہ کو آپریٹیو کی طرف سے دعویٰ پیش کرتے ہوئے کہاکہ بینک صدر اکثریت کھو چکے ہیں، اس کے لئے انتخابات کا ہونا لازمی ہے۔ معاملہ کی پوری سنوائی کی سماعت کرنے کے بعد منصف ایس سے نذیر نے حکم امتناعی کو رد کئے جانے کا حکم صادر کیا۔

خبر ملی ہے کہ عدالتی حکم نامے سے سنیل نائک کا گروہ بہت متحرک ہوگیا ہے، عدم اعتماد کی تحریک کو لے کر دوبارہ اکھاڑہ تیار ہوگیا ہے۔ 22 اکتوبر کومنعقد ہوئی عدم اعتماد تحریک کی میٹنگ آپسی الزام تراشی اور عدالتی احکامات کی پیچیدگی سے ملتوی کی گئی تھی۔ عدالتی حکم نامے کے متعلق کوآپریٹیو افسر پی این نائک نے کہاکہ عدالت نے حکم امتناعی کو رد کرکے جلد انتخابات کرنےکا حکم دیا ہے۔ عدم اعتماد تحریک کی میٹنگ منعقد کرنےکے لئے کم سے کم 7دن کی مہلت دینی ہوتی ہے۔ مزید بتایا کہ جمعرات کو اس کے متعلق ضروری فیصلہ کیا جائے گا۔