بھٹکل 26/جون (ایس او نیوز) گائیوں کو تحفظ فراہم کرنے کے نام پر گائیوں کو لے جارہی ایک ٹرک پر حملہ کرتے ہوئے لاری ڈرائیور اور کلینر کو شدید زخمی کرنے کے الزام میں  مرڈیشور میں گرفتار 13 لوگوں کی  جوڈیشیل کسٹڈی کو بڑھادیا گیا ہے۔

کاروار جیل میں بند سبھی 13 ملزموں کو آج منگل صبح بھٹکل جوڈیشیل میجسٹریٹ فرسٹ کلاس کورٹ میں پیش کیا گیا اور عدالت نے  سبھی 13 ملزموں کی کسٹڈی   کو آگے کے لئے بڑھادیا ۔

خیال رہے کہ گذشتہ ماہ 21 مئی کو بھٹکل تعلقہ کے مرڈیشور بستی نیشنل ہائی وے پر گئو آتنکیوں نے گائیوں اور بچھڑوں سے بھری دو لاریوں کو یہ سوچ کر اسے بھٹکل کے قصائی خانہ میں لے جایا جارہا ہے،   روک کر زبردست غنڈہ گردی کرتے ہوئے دونوں لاریوں کے ڈرائیوروں اور کلینروں کی بری طرح مارپیٹ کی تھی اور سبھی جانوروں کو لاریوں  سے نکال کر آزاد کردیا تھا۔ بعد میں پتہ چلا تھا کہ جانوروں سے بھری دونوں لاریاں گجرات کے ایک گئو شالہ سے  کیرالہ کے ایک ڈیری ملک  لے جائی جارہی تھی اور متعلقہ ڈیری ملک   دکشن کنڑا کے ایک رکن اسمبلی کے بھائی  کی تھی۔

لاری ڈرائیور کے ذریعے شکایت درج کرتے ہی  پولس نے  حملہ آروں کے خلاف معاملات درج کرتے ہوئے  فوری طور پر سبھی فرار شدہ جانوروں کو واپس حاصل کرلیا تھا اور 13 لوگوں کو گرفتار کرلیا تھا، جنہیں آج بھٹکل کی عدالت میں پیش کیا گیا اور عدالت نے ان کی کسٹدی مزید کچھ دنوں کے لئے بڑھادی۔