بھٹکل: اتر کنڑا حلقہ میں بی جے پی کا ٹکٹ پسماندہ طبقے کے امیدوار کو دیا جائے ۔ مراٹھا لیڈر شیام سندر کا مطالبہ
بھٹکل 18 / جنوری (ایس او نیوز) چھتریہ مراٹھا مہا سنگھ کے صدر اور بی جے پی لیڈر وی ایس شیام سندر گائیکواڑ نے بی جے پی ہائی کمانڈ سے مطالبہ کیا ہے کہ اس مرتبہ پارلیمانی الیکشن میں اتر کنڑا سے کسی پسماندہ طبقے کے فرد کو امیدوار بنایا جائے ۔
بھٹکل رائیل اوک ہوٹل میں منعقدہ پریس کانفرنس سے خطاب کرتے ہوئَے شیام سندر نے کہا کہ اتر کنڑا پارلیمانی حلقے میں مراٹھا، نائک، ماہی گیر سمیت دیگر پسماندہ طبقات سے تعلق رکھنے والے ووٹرس بڑی تعداد میں آباد ہیں اس لئے اس مرتبہ یہ ٹکٹ پسماندہ طبقے کو ملنا چاہیے ۔
انہوں نے کہا کہ گزشتہ پارلیمانی الیکشن میں بی جے پی نے پسماندہ طبقے کے ایک فرد کو بھی ٹکٹ نہیں دیا تھا ۔ اس مرتبہ ایسا نہیں ہونا چاہیے ۔ وزیر اعظم نریندرا مودی نے دیش میں بہت کام کیا ہے مگر چونکہ ریاست میں اس وقت کانگریسی حکومت ہے اس لئے جیت کے لئے بہت زیادہ جد و جہد کرنی پڑے گی۔ بیلگام ، چیکوڈی، اتر کنڑا، دھارواڑ اور بیدر ضلع میں مراٹھا طبقے کا بڑا اثر ہے ۔ اگر مراٹھا طبقے کو بی جے پی کا ٹکٹ دیا جاتا ہے تو بقیہ سات سیٹوں پر جیت درج کرنے میں آسانی ہوگی ۔
شیام سندر نے موجودہ رکن پارلیمان پر تبصرہ کرتے ہوئے کہا کہ اپنی پارلیمانی میقات کے دوران گہری نیند سونے والے اننت کمار ہیگڈے اب الیکشن قریب آتے ہی جاگ اٹھے ہیں ۔ گزشتہ سات مرتبہ کے انتخابات کے دوران بھی مراٹھا سماج ہمیشہ اننت کمار ہیگڈے کی تائید کرتا آیا ہے ۔ میں خود گزشتہ 30 برس سے بی جے پی کے فروغ کے لئے کام کرتا رہا ہوں ۔ بنگلورو کے اننت کمار کے تعاون سے شیواجی کے والد کی سمادھی کے لئے محنت کی ہے ۔ ایڈی یورپّا کو وزیر اعلیٰ بنانے کے لئے بھی مراٹھا سماج نے حمایت کی ہے ۔ بی جے پی کو چار ایم ایل اے سے 36 اور پھر 110 اراکین اسمبلی تک لے جانے میں بھی مراٹھا سماج کا ہاتھ ہے ۔ اس لئے اس مرتبہ اننت کمار ہیگڈے کو چاہیے کہ وہ خود ہی پیچھے ہٹتے ہوئے میرے لئے موقع فراہم کریں ۔
پریس کانفرنس میں موجود منڈ گوڈ سالگاوں گورمّا جی مٹھ کے ویرپاکشا سوامی جی نے کہا کہ رام رتھ کو ہر ایک تعلقہ میں لے جانے والے شیام سندر گائیکواڈ کو بی جے پی کی طرف سے تقویت ملنی چاہیے ۔ ہر کوئی چھترپتی شیواجی کا احترام کرتا ہے ۔ ان کے چھتریہ سماج کو اقتدار دینا چاہیے ۔
