بھٹکل : رابعہ سیفی عصمت ریزی اورسفاکانہ قتل معاملہ پر انصاف کا مطالبہ ۔ مجلس اصلاح و تنظیم نے دیا میمورنڈم
بھٹکل،10؍ ستمبر (ایس او نیوز) دہلی محکمہ پولیس میں شامل رابعہ سیفی کی عصمت ریزی اور سفاکانہ قتل کے خلاف انصاف کا مطالبہ کرتے ہوئے مجلس اصلاح وتنظیم کی جانب سے منی ودھان سودھا کے باہر احتجاج کے بعد اسسٹنٹ کمشنر کے توسط سے میمورنڈم پیش کیا گیا ۔
تنظیم کی قیادت میں مظاہرہ کے بعد دئے گئے میمورنڈم میں خاتون پولیس افسر رابعہ سیفی کے ساتھ کی گئی درندگی اور سفاکی کی مذمت کرتے ہوئے مطالبہ کیا گیا ہے کہ اس معاملہ کی تحقیقات کسی آزاد ایجنسی سے کروائی جائے ۔
اس موقع پر بات کرتے ہوئے جنتا دل لیڈر عنایت اللہ شاہ بندری نے کہا کہ مرکزی حکومت کو چاہیے کہ دہلی میں ہوئے خاتون پولیس افسر کے قتل معاملہ کو سنجیدگی سے لے ۔ انہوں نے کہا کہ دوسرے ممالک کی خواتین کے تعلق سے فکرمند رہنے والے وزیر اعظم نریندر مودی کو ملک کے اندر خواتین کی عصمت دری اور قتل کے معاملے دکھائی نہیں دے رہے ہیں ۔ مرکزی حکومت کا نعرہ 'بیٹی بچاو - بیٹی پڑھاو' محض نعرہ ہی بن کر رہ گیا ہے ۔ خاتون پولیس افسر جب سرکاری ڈیوٹی پر تھی اسی وقت اسے اغوا کرکے عصمت دری کے بعد قتل کردیا گیا ہے ۔ ہم لوگ اس کی کڑی مذمت کرتے ہیں ۔ اور مطالبہ کرتے ہیں کہ اس معاملہ کی پوری تحقیقات ہو اور ملزمین کو کڑی سے کڑی سزا دی جائے ۔
تنظیم کے جنرل سیکریٹری عبدالرقیب ایم جے نے بھی خطاب کرتے ہوئے رابعہ سیفی کی عصمت دری اور بے دردی سے قتل کیے جانے پر کڑی مذمت کرتے ہوئے خاطیوں کو کڑی سے کڑی سزا دینے کا مطالبہ کیا ۔
ایڈوکیٹ عمران لنکا نے میمورنڈم پڑھا ۔ اسسٹنٹ کمشنر ممتا دیوی نے میمورنڈم قبول کرتے ہوئے کہا وہ اسے اعلیٰ افسران تک پہنچائیں گی ۔
اس موقع پر تنظیم صدر ایس ایم پرویز، ٹی ایم سی صدر پرویز قاسمجی ، مسلم یوتھ فیڈریشن صدر مولانا عزیزالرحمٰن رکن الدین کے علاوہ الطاف کھروری، صادق مٹا، رووف نائیطے سمیت تنظیم کے اراکین انتظامیہ اور دیگر افراد کثیر تعداد میں موجود تھے ۔