بھٹکل: ’مہاشیوراتری ‘کے پیش نظر ضلعی انتظامیہ کے زیر اہتمام 8مارچ کی شام مرڈیشور کے ساحل سمندر پر ہورہا ہے خصوصی پروگرام
بھٹکل :7؍مارچ (ایس اؤ نیوز ) برادران وطن کی مقدس رات ’مہا شیوراتری ‘ کے پیش نظر 8مارچ 2024 بروز جمعہ کو مرڈیشور کے ساحل سمندر پر اترکنڑاضلع انتظامیہ کےزیرا ہتمام پہلی بار ضلعی سطح کا عالیشان پروگرام منعقد ہورہا ہے۔ جہاں مقامی فن کاروں کے ساتھ ساتھ دیگر معروف فنکاروں کی بھی خدمات حاصل کی گئی ہیں جو مختلف پروگرام پیش کرتے ہوئے عوام کو محظوظ کریں گے۔ مہاشیوراتری کا پروگرام جمعہ کی شام چھ بجے شروع ہوگا اور صبح چھ بجے اختتام کو پہنچے گا یعنی یہ پروگرام پوری رات جاری رہے گا۔ ، بھجن ، تھری ڈی میاپنگ اور لیزر شو کے ساتھ ساتھ مذہبی گیت اور دیہی پروگرام بھی اس میں شامل رہیں گے۔ اس ضمن میں مرڈیشور میں پروگرام کے انعقاد کو لے کر تیاریاں زوروں سے جاری ہیں۔ ان تمام باتوں کی جانکاری بھٹکل اسسٹنٹ کمشنر ڈاکٹر نینا نے پریس کانفرنس کا انعقاد کرتے ہوئے دی۔
انہوں نے بتایا کہ ضلعی سطح کا پروگرام 8مارچ جمعہ کی شام 6 بجے مرڈیشور کے ساحل پر منعقد ہوگا۔ جس کا افتتاح ضلع نگراں کاروزیر منکال وئیدیا کریں گے ۔شام 6بجے سے صبح 6بجے تک چلنےوالے پروگراموں میں ریاست کےمشہور فن کار گانوی لکشمن، نرنجن دیش پانڈے، کارتیک مہیش، پربیتا گوڈا، لیجنڈری وینا میسٹرو ، اننیا بھٹ، اشوین شرما اینڈ ٹیم، سنٹر تھٹ اٹراکیشن،اگینان ائیتال اینڈ ٹیم سمیت مختلف فن کار اپنے اپنے فن کا مظاہرہ کریں گے۔
پروگرام میں ودھان پریشد کے اسپیکر بسوراج ہوراٹی ، انتظامیہ سدھار آیوگ کےصدر آر وی دیش پانڈے، کرناٹکا مارکیٹنگ کنسلٹ اینڈ ایجنسی کے صدر ستیش سئیل اعزازی طور پر شرکت کریں گے ۔ ضلع کے ایم پی، ضلع کے ارکان اسمبلی ، ارکان پریشد مہمان خصوصی کی حیثیت سے شریک ہونگے۔ بھٹکل کی اسسٹنٹ کمشنر ڈاکٹر نینا، ماولی-2گرام پنچایت کی صدر ناگ رتنا پڈیاراور حکومت کرناٹکا کے چیف سکریٹری رتیش کمار سنگھ خصوصی مدعوئین کے طورپر حاضر رہیں گے۔ اس موقع پر سبھی بھگتوں سے متعلقہ پروگرام میں شریک ہونے کی اپیل کی گئی ہے۔