بھٹکل :17/ستمبر(ایس اؤ نیوز) ضلع پنچایت اترکنڑا، تعلیمات عامہ محکمہ اترکنڑا، بی ای اؤ دفتر بھٹکل اور تعلقہ ہائی اسکول فزیکل ٹیچرس اسوسی ایشن کے اشتراک سے بھٹکل تعلقہ سطح کے ہائی اسکول طلبا و طالبات کے درمیان کھیل مقابلوں کا پیر کو تعلقہ کے بیلکے سرکاری ہائی اسکول میدان میں شروع ہوئے۔

تعلقہ پنچایت سماجی انصاف کمیٹی کی صدر میناکشی جٹپا نائک نے کھیل مقابلوں کا افتتاح کرنے کے بعد کہاکہ آج کی دنیا میں کھیل کا میدان بھی اہمیت اختیار کرچکاہے، انہوں نے کھیل کو کھیل کی حد تک کھیلتے ہوئے ضلع و ریاستی سطح تک پہنچنے کے لئے کھلاڑیوں کو صلاح دی۔ بیلکے گرام پنچایت صدر رمیش نائک نے افتتاحی پروگرام کی صدارت کی۔  مہمان خصوصی کی حیثیت سے کرناٹکا سرکاری ملازمین سنگھ بھٹکل شاخ کے صدر ایم بی نائک، بیلکے سرکاری ہائی اسکول کے صدر مدرس چندرکانت گاونکر، فزیکل ایجوکیشن کمیشنر شری کانت نایک ، ایس آر گونڈ وغیرہ ڈائس پر موجود تھے۔ بی ای او ایم آر مونجی نے استقبال کرتے ہوئے افتتاحی کلمات پیش کئے تو مدھوکر ہیگدے نے نظامت اور گوپانائک نے شکریہ اداکیا۔

عوامی نمائندوں کی غیر حاضری : تعلقہ سطح کے کھیل مقابلے دعوت نامے میں دو دو صفحات پر صرف عوامی نمائندوں کے نام ہی پرنٹ کئے گئے تھے۔ جب کہ پروگرام میں ایک دو کے سوا کوئی بھی نظر نہیں آیا۔ پروٹوکال کے بہانے دعوت ناموں میں عوامی نمائندوں کے ناموں کو شائع کیا جاتاہے، اس میں کہیں کوئی غلطی ہوجاتی ہے تو یہی عوامی نمائندے ، افسران کو بر ا بھلا کہنے میں کوئی کسر نہیں چھوڑتے ۔ رکن اسمبلی، ضلع پنچایت، تعلقہ پنچایت، گرام پنچایت کے ممبران ، مختلف کمیٹیوں کے صدور چاہتے تو ہیں کہ ہر جگہ ان کانام ہو، مگر حاضر ہونا ضرور ی نہیں سمجھتے ، یہی وجہ ہے کہ کئی پروگرام ان کے بغیر ہی انجام دئیے جاتے ہیں۔ انہی جھمیلوں کو دیکھتے ہوئے عوام نے اس پروٹوکال کو ہی ختم کرنے پر زور دیا ہے۔