بھٹکل، 16/ جنوری (ایس او نیوز) مرڈیشور پولیس تھانہ حدود کے تیرنا مکّی نیشنل ہائی وے پر ایک لاری اور بولیروگڈس وین کے درمیان ہوئے تصادم میں پانچ افراد زخمی ہوگئے۔ حادثہ اتوار اور پیر کی درمیانی شب قریب ڈھائی بجے پیش آیا۔
    
بتایا جاتا ہے کہ نرگندا کا رہنے والا لاری ڈرائیور بسوا راجپّا مرڈیشور سے بھٹکل کی طرف اپنی لاری لے جا رہا تھا جس کے دوران مخالف سمت سے آنے والی ایک تیز رفتار بولیرو گڈس ٹمپو تیرنا مکی کے مقام پر ڈیوائڈر پر چڑھنے کے بعد بے قابوہوکر لاری سے ٹکرا گئی ۔ گڈس ٹمپو ڈرائیور کی غفلت اور بے پروائی سے پیش آئے اس حادثہ میں دونوں گاڑیوں کے ڈرائیوروں کے علاوہ کار میں موجود ایک خاتون اور دیگر دو افراد زخمی ہوگئے ہیں جنہیں قریبی اسپتال داخل کیا گیا ہے۔
    
اس ضمن میں روی کمار رمیش کمبار نامی شخص کی شکایت پر مرڈیشور پولیس نے کیس درج کیا ہے۔