بھٹکل: ممنوعہ سمندری علاقے میں مچھلیوں کا شکار کرنے کا الزام عائد کرتے ہوئے مقامی ماہی گیروں نے پکڑ لیں منگلورو کی 2 کشتیاں
بھٹکل 13 / جنوری (ایس او نیوز) بھٹکل تعلقہ کے ممنوعہ سمندری علاقے میں مچھلیوں کا شکار کرنے والی منگلورو کی 2 کشتیاں مقامی ماہی گیروں نے پکڑ لیں اور الوے کوڈی بندر تک لانے کے بعد پابندی کی خلاف ورزی کرنے والی ماہی گیر کشتیوں کے خلاف اقدام کا مطالبہ کرتے ہوئے احتجاجی مظاہرا کیا ۔
مظاہرین کا کہنا تھا کہ کل مرڈیشور سمندری علاقے میں ماہی گیروں کی دوران انہوں نے دیکھا کہ وہاں پر ممنوعہ علاقے میں منگلورو سے تعلق رکھنے والی کشتیاں بھی مچھلیوں کا شکار کرنے میں مصروف ہیں ۔ ہم لوگ یہ کشتیاں کھینچ کر الوے کوڈی جیٹی تک لائے ہیں ۔ اس بارے میں پولیس اور کوسٹ سیکیورٹی فورس کو اطلاع دینے کے باوجود اب تک ان کشتیوں کے خلاف کارروائی نہیں کی گئی ہے ۔
انہوں نے کہا اس طرح باہر سے آنے ولی کشتیوں کے ذریعے غیر قانونی طور پر یہاں ماہی گیری ہونے کے بارے میں کوسٹل پولیس کو بھی اطلاع دی جاتی رہی ہے ، لیکن وہ لوگ بھی غیر قانونی ماہی گیری پر روک لگانے کے سلسلے میں کوئی قدم اُٹھانے میں ناکام رہے ہیں ۔ ممنوعہ علاقے میں ماہی گیری ہونے کی وجہ سے روایتی انداز میں مچھلیوں کا شکار کرنے میں دشواری ہو رہی ہے ۔ اس سے مقامی مچھیروں کے لئے دن گزارنا مشکل ہوتا جا رہا ہے ۔ اس لئے ممنوعہ علاقے میں مچھلیوں کا شکار کرنے والی کشتیوں پر کم از کم 10 لاکھ روپے کا جرمانہ لگاتے غیر قانونی طور پر ممنوعہ علاقے میں ماہی گیری کرنے والوں کو سخت پیغام دینا چاہیے ۔
اسسٹنٹ ڈائریکٹر فشریز روی نے احتجاج کے مقام پر پہنچ کر مظاہرین سے بات چیت کی اور قانونی کارروائی کرنے کا تیقن دیا ۔