بھٹکل :9؍مارچ   (ایس اؤ نیوز )  تعلقہ کے سیاحتی مقام مرڈیشور بیچ پر امسال پہلی بار سرکاری سطح پر مہاشیوراتری کا انعقاد کیا گیا،  پروگرام کا افتتاح کرتے ہوئے  ضلع نگراں کار وزیر منکال وئیدیا نے اعلان کیا کہ  اس طرح کا پروگرام  اب ہر سال مرڈیشور میں منایا جائے گا۔

 ضلع انتظامیہ ، محکمہ کنڑا  سنسکرتی اور محکمہ سیاحت کے اشتراک سے 8مارچ  بروز جمعہ کو منعقدہ مہاشیوراتری جاگرنا اتسوا پروگرام کا افتتاح کرنےکےبعد خطاب کرتے ہوئے  وزیر موصوف نے کہاکہ مرڈیشور میں آج کی رات جس طرح کا مذہبی جشن منعقد کیاگیا ہے اسی طرح آئندہ  سال بھی  پورے  جوش و خروش کے ساتھ  یہ مذہبی دن  منایا جائے  گا۔ انہوں نے کہا کہ  اس پروگرام کے ذریعے مرڈیشور کی ہمہ جہت ترقی کےلئے ممکنہ کوشش کی جائے گی  اور سیاحت کو فروغ دیا جائے گا۔انہوں نے  آر این شٹی کی کوششوں  کو سراہتے ہوئے  اعتراف کیا کہ  ان کی وجہ سے ہی مرڈیشور عالمی سطح پر مشہور ومعروف ہوا۔ 

اترکنڑا ڈپٹی کمشنر گنگوبائی مانکر نے خطاب کرتےہوئےکہاکہ  مرڈیشور میں سیاحت کی مختلف سرگرمیوں کو انجام دیتے ہوئے مزید سیاحوں کو راغب کرنے کی کوشش کی جائے گی۔ اس موقع پر ضلع پنچایت کے سی ای اؤ ایشور کاندو، ایس پی وشنو وردھن ، ہوناور کے آر ایف اؤ اور ایڈیشنل ڈپٹی کمشنر پرکاش راجپوت ، بھٹکل کی اسسٹنٹ کمشنر ڈاکٹر نینا، بھٹکل کے تحصیلدار تپے سوامی ، محکمہ سیاحت کے افسر جینت، ماولی گرام پنچایت کی صدر ناگرتنا کوگّا، مرڈیشور مندر کےپجاری جئے رام اڈگ، مرڈیشور دیہی پرتشٹھان کے صدر ایس ایس کامت موجود تھے۔سنجنا جئے پرکاش کرکیکر نے پرارتھنا کی۔ منجولا شیرور کی قیادت والی اساتذہ کی ٹیم نے صوبائی ترانہ پیش کیا۔ استاد شری دھر شیٹھ  اور ونیتا شیٹھ نے پروگرام کی نظامت کی۔  جمعہ شام چھ بجے شروع ہونے والا پروگرام سنیچر صبح چھ بجے تک جاری رہا۔