بھٹکل: انجمن پی یوکالج کے سالانہ جلسہ کا انعقاد : تعلیم زندگی کو روشنی اور مستقبل کو بہتر بناتی ہے : مقررین کا اظہار خیال
بھٹکل :31؍جنوری (ایس اؤ نیوز )طلبا اپنی تعلیم کو بامقصد بناتےہوئے زندگی کو بامعنی بنائیں ، خوف خدا، اسلامی فکر کو اپنی تعلیم کا حصہ بنائیں ، وقت ضائع کئے بغیر نیکی و بھلائی کےکاموں میں صرف کریں ، کڑی محنت و مشقت سے اپنی تعلیم جاری رکھتے ہوئے زندگی میں کامیابی کےمنازل طئے کریں۔ جامعہ اسلامیہ بھٹکل کے استاد ، کہکشاں کے روح رواں مولانا محمد سمعان خلیفہ ندوی نے ان خیالات کا اظہار کیا۔
وہ یہاں 30جنوری 2024بروز منگل کو انجمن کالج میدان میں منعقدہ انجمن پی یوکالج بھٹکل کا سالانہ جلسہ میں بطور مہمان خصوصی طلبا سے مخاطب تھے۔ مولانا نے طلبا کو خاص کر موبائیل سے دور رہنے کی تلقین کرتےہوئے کہاکہ بہتر اور نتیجہ خیز کاموں میں اپنی صلاحیت کو استعمال کریں تاکہ ایک روشن و بہتر مستقبل میسر ہو۔ اعزازی مہمان کے طورپر انجمن کے الومنی چارٹرڈاکاؤنٹنٹ سعود دامودی نے طلبا سے کہاکہ زندگی میں انفرادی سطح پر جو محنت کی جاتی ہے وہ رنگ لاتی ہے اور اپنا مقصد واضح رکھنا ضروری ہے۔ تعلیم معلومات اور صلاحیت سے بھی آگے کی چیز ہے، دراصل تعلیم سے شخصیت کی تعمیر ہوتی ہے ۔ انہوں نے کہاکہ تعلیم زندگی کا ایک طاقتور ہتھیار ہے جو ہمیں اپنی قوم کو مزید ترقی کی راہوں پر لےجانےمیں کام آتاہے۔ اسی طرح ہمیں اپنی قوم کی خاطر قانون کےماہرین کی صف میں شامل ہونا ضروری ہے یعنی ہمیں وکیل بننے کی طرف بھی توجہ دینی ضروری ہے۔
سال 2023-24کے سالانہ ثقافتی ،کھیل مقابلہ میں شریک طلبا کے درمیان انعامات کی تقسیم عمل میں آئی ۔ ثقافتی شعبہ میں عزیزی عبدالحنان ابن محمد حفیظ عسکری چمپئین بنے تو عزیزی ذیشان کھیل کےمیدا ن میں چمپئین بنے۔ جب کہ عزیزی محمد لاٹ کو بیسٹ این سی سی کیڈٹ ایوارڈ سے نوازاگیا۔ کالج کے متعلمین میں سے عزیزی محمد تمشیر، عزیزی مہران حسین معلم اور عزیزی ذاکر حمدان ابن سمیع اللہ اٹل نے اپنے دو سالہ تعلیمی تاثرات کا اظہار کیا۔ اسی طرح اپنے مضامین میں بہتر نتائج پیش کرنے والے اساتذہ کو بھی نقد انعام سے نوازاگیا۔ انجمن بی بی اے اینڈ بی سی اے کالج کےسکریٹری آفتاب قمری نے جلسہ کی صدارت کی۔
عزیزی انس سدی باپا کی تلاوت قرآن سے جلسہ کا آغاز ہوا۔ عزیزی ہود سدی باپا نے ہدیہ نعت پیش کی۔ عزیزی شاز آرمار نے غزل پیش کرتےہوئے حاضرین کو محظوظ کیا۔ کالج فنکشن چیرمن ریاضی کے لکچرر پروفیسر اسماعیل غسان چامنڈی نے استقبال کرتےہوئے مہمانوں کا تعارف پیش کیا۔ کالج پرنسپل پروفیسر محمد یوسف کولانے کالج رپورٹ کی خواندگی کی۔ کالج کے نائب پرنسپل انگریزی کے لکچرر پروفیسر عبدالرحیم خان نے شکریہ کلمات ادا کئے۔ تو عزیزی عبدالحنان عسکری اور عزیزی عبدالرحمن آرمار نے جلسہ کی بہترین نظامت کی۔ ڈائس پر کالج بورڈ سکریٹری ڈاکٹر سید سلیم وغیرہ موجود تھے۔