بھٹکل : ایم کام میں انجمن کو ملی صدفی صد کامیابی
بھٹکل:23؍ مارچ (ایس او نیوز) کرناٹکا یونیورسٹی دھارواڑ کے زیر اہتمام ستمبر اکتوبر 2023میں منعقدہ ایم کام کے فائنل سمسٹر میں انجمن ڈگری کالج اینڈ پی جی سنٹر بھٹکل کے طلبا نے صد فی صد نتائج کے ساتھ نمایاں کامیابی درج کی ہے۔
انجمن کی طرف سے فراہم کی گئی معلومات کے مطابق ایم کام فورتھ سمسٹر کے امتحان میں 15طلبا نے پرچہ لکھا تھا، تمام طلبا کامیاب ہوئے ہیں اس طرح کامیابی کی شرح سو فی صد درج کی گئی ہے۔ پندرہ میں 11امتیازی، نمبرات سے اور بقیہ 4فرسٹ کلاس سے کامیاب ہوئے ہیں۔ کالج کی سطح پر پرگتی نارائن ہیبار 75.66فی صد نمبرات کے ساتھ اول، بھویّا ایشور نائک 75.33فی صد نمبرات کے ساتھ دوم اور 74.66فی صد نمبرات کے ساتھ بھوانی تمپا گونڈا سوم مقام سے کامیاب ہوئی ہیں۔ امتحانات میں کامیاب سبھی طلبا و طالبات کو انجمن حامئی مسلمین بھٹکل کے صدر محمد یونس قاضیا، جنرل سکریٹری اسحاق شاہ بندری ، ایڈیشنل جنرل سکریٹری آفتاب قمری ، کالج بورڈ سکریٹری ڈاکٹر سلیم سمیت دیگر عہدیداران ، اراکین، پرنسپل اور اساتذہ نے مبارکباد پیش کی ہے۔