بنگلور عیدگاہ میدان تنازعہ: گنیش اتسو کی اجازت نہیں دی تو نماز پڑھنے پر بھی اُٹھایاجائے گا سوال ؛ سی ٹی روی
بنگلورو،18؍اگست (ایس او نیوز؍ایجنسی) چامراج پیٹ عیدگاہ میدان کے حوالہ سے جاری تنازعہ کے درمیان بی جے پی کے قومی جنرل سیکریٹری سی ٹی روی نے یہ کہہ کر تنازعہ کو مزید ہوا دے دی ہے کہ اگر میدان میں گنیش اتسو کی اجازت نہیں دی گئی، تو وہاں نماز ادا کرنے کی اجازت پر بھی سوال اٹھایا جائے گا۔ بی جے پی کے رکن اسمبلی نے کہا کہ عیدگاہ میدان محکمہ محصولات کی اراضی ہے، لہذا زمین سے وابستہ فیصلے اسی کو لینے ہوں گے۔
سی ٹی روی نے کہا ’’جب عیدگاہ میدان میں گنیش کی مورتی نصب کرنے کی اجازت نہیں دی جاتی تو یہ حقوق کا معاملہ بن جائے گا۔ محکمہ محصولات کو اجازت دینے پر غور کرنا ہوگا۔ اور میں کہوں گا کہ اجازت دی جانی چاہئے۔‘‘
انہوں نے کہا ’’میں عہدیداران سے گنیش اتسو کے لئے اجازت فراہم کرنے کی گزارش کرتا ہوں۔ اگر اسے نامنظور کیا جاتا ہے، تو سوال اٹھائے جائیں گے کہ وہاں نماز ادا کرنے کی اجازت کیسے دی جا سکتی ہے؟ اگر نماز کی اجازت ہے، تو گنیش اتسو کی کو بھی جازت دی جانی چاہئے۔‘‘
اس سے پہلے سی ٹی روی نے چامراج پیٹ کے کانگریس ایم ایل اے ضمیر احمد خان کو چیلنج کیا تھا کہ اُن میں ہمت ہے تو ہمیں عیدگاہ میدان میں گنیش کی مورتی نصب کرنے سے روک کر دکھائے۔ روی نے کہا تھا کہ "اگر ہم اپنا ارادہ کر لیں تو گنیش کی مورتی میدان میں ہی نصب کی جائے گی، میدان ضمیر احمد خان کی جاگیر نہیں ہے۔ ہم گنیش کی مورتی نصب کریں گے اور تہوار کو شاندار طریقے سے منائیں گے"۔ روی نے یہ بھی کہا تھا کہ ’’ہم میدان میں گنیش کی مورتی نصب کرنے کے لیے اُس کی اجازت کیوں لیں؟ ہم عرب ممالک میں مورتی نصب نہیں کر رہے ہیں"۔
پتہ چلا ہے کہ سی ٹی روی کے اشتعال انگیز بیان اور گنیش تہوار کو عیدگاہ میدان میں منانے کی تیاریوں کو دیکھتے ہوئے ضمیر احمد خان نے سٹی پولیس کمشنر کے دفتر کا دورہ کیا تھا اور سی ایچ پرتاپ ریڈی سے بات چیت کی تھی۔ بعد میں ڈی سی پی (مغربی) لکشمن بی نمبرگی نے مسلم مذہبی تنظیموں کے قائدین کے ساتھ امن میٹنگ کا انعقاد کرتے ہوئے قائدین کو ہدایت دی تھی کہ وہ کوئی ایسا قدم نہ اٹھائیں جس سے امن و امان میں خلل پڑے۔ انہوں نے انہیں متنبہ بھی کیا تھا کہ اگر کوئی امن کو خراب کرنے والی سرگرمیوں میں ملوث ہوا تو پولیس سخت کارروائی کرے گی۔ سی طرح کا انتباہ نمبرگی نے ہندو تنظیموں کے لیڈروں سے بھی ملاقات کرکے دیا تھا اور انہیں بھی یہی بتایا تھا کہ امن و امان کو خراب کرنے کی سرگرمیوں میں کوئی ملوث پایا جاتا ہے پولس اس سے سختی کے ساتھ نپٹے گی۔
خیال رہے کہ ملک میں 31 اگست سے گنیش اتسو منایا جائے گا اور ہندو تنظیمیں چامراج پیٹ عیدگاہ میدان پر تہوار منانے کی تیاریاں کرر ہی ہیں۔ وہیں، کانگریس کے رکن اسمبلی ضمیر احمد خان نے محکمہ محصولات پر زور دے کر کہا ہے کہ وہ عیدگاہ میدان پر گنیش اتسو منانے کی جازت نہ دے۔
