بنگلورو:24؍دسمبر(ایس اؤ نیوز ) ریاستی وزیر برائے ٹرانسپورٹ رام لنگا ریڈی نے ہفتہ کو کرناٹک اسٹیٹ روڈ ٹرانسپورٹ کارپوریشن (کے ایس آر ٹی سی ) کی ’’نمّا کارگو ‘ ٹرک سروس کا افتتاح کیا۔ جس کے ذریعے ریاست کے مختلف اضلاع کے درمیان مال بردار خدمات کو انجام دیاجائے گا۔

افتتاح کے بعد وزیر رام لنگا ریڈی نے کہاکہ آج ہم نے 20ٹرکوں کا افتتاح کیاگیا ہے، اگلے ایک ماہ میں کارگو سروس کےلئے 100ٹرک اور اگلے سال کے آخر تک 500ٹرک فراہم کئے جائیں گے۔ انہوں نے بتایا کہ پینیا کے بسویشور بس اسٹینڈ کو کارگو ٹرکوں کے آپریشن اور دیکھ بھال کے لئے ڈپو کے طورپر استعمال کیا جائے گااور باقی خالی جگہ سرکاری کمپنیوں کو تجارتی آمدنی پیدا کرنے کےلئے دی جائے گی۔ واضح رہے کہ کے ایس آرٹی سی نے سال 2021میں ہی بسوں کے ذریعے اپنی مال بردار خدما ت کا آغاز کیا تھا۔ اب ٹرانسپورٹ کمپنی نے بھاری سامان لے جانے کےلئے چھ پہیوں والے ٹرکوں کا ستعمال شروع کیا ہے ، جس کے ذریعے 6ٹن سامان لے جاسکتےہیں۔ کے ایس آرٹی سی ذرائع نے خبر دی ہے کہ یہ ٹرک ریا ست کے مختلف مقامات سے چلیں گی۔ جن میں بنگلورو، میسورو، ٹمکور، ہاسن، منگلورو، شیموگہ ، چکمگلورو، کولار، ڈوانگیرے شامل ہیں۔ اگر ان خدمات پر اچھا رسپانس ملتاہے تو مزید نئے ٹرک خرید دیگر اضلاع سے بھی سروس شروع کی جائے گی۔ ابتدائی طورپر محکمہ ٹرانسپورٹ نے فارما سیوٹکل ، ٹکسٹائیل ، فوڈ انڈسٹریز سے مال برداری کا ارادہ ہے۔