غزہ پر اسرائیلی بمباری جاری، 50 سے زائد افراد شہید
غزہ، 29/دسمبر(ایس او نیوز/ایجنسی) غزہ پٹی کے شہروں میں اسرائیل کی جانب سے معصوم عوام اور شہریوں پر اندھا دھند بمباری کا سلسلہ جاری ہے اور سینکڑوں لوگوں کو موت کے گھاٹ اتارا جارہا ہے۔ میڈیا رپورٹوں کے مطابق بیت لاحیہ، خان یونس اور المغازی پر جمعرات کو اسرائیلی حملوں میں 50 سے زائد افراد جاں شہید ہو گئے ہیں جبکہ سینکڑوں زخمی ہوئے ہیں۔ غزہ کی وزارت صحت کے ترجمان اشرف القدرا نے ایک بیان میں بتایا کہ حملوں میں بعض کی حالت قدرے تشویشناک ہے اس لئے مرنے والوں کی تعداد میں اضافہ ہو سکتا ہے۔
فلسطینی خبر رساں ادارے وفا کے مطابق، شمالی غزہ پٹی میں بیت لاحیہ میں ایک رہائشی چوک پر اسرائیلی بمباری میں 30 سے زائد افراد ہلاک ہو گئے۔مسٹر قدرا نے ایک پریس کانفرنس کے دوران کہا کہ جمعرات کو غزہ پٹی میں فلسطینیوں کی ہلاکتوں کی تعداد بڑھ کر 21,320 ہوگئی، جب کہ 55,603 زخمی ہوئے۔ انہوں نے کہا کہ اسرائیلی حملوں کی وجہ سے گزشتہ 24 گھنٹوں کے دوران 210 افراد مارے گئے۔
رپورٹ کے مطابق اسرائیلی حملوں میں3ہزار111طبی عملہ،40شہر دفاع کاعملہ جاں بحق ہوا، اسرائیلی بربریت میں100سے زائد صحافی بھی جاں بحق ہوئے۔فلسطینی اتھارٹی کا کہنا ہے کہ اسرائیلی حملوں میں7ہزار فلسطینی لاپتہ اور ملبے تلے دبے ہیں،اسرائیلی حملوں میں55ہزار243فلسطینی زخمی ہوئے۔
اس کے علاوہ اسرائیلی حملوں میں92اسکول اور یونیورسٹیاں تباہ ہوچکی ہیں، اسرائیل نے حملے کرکے115مساجد کو شہیداور3گرجا گھروں کو تباہ کیا۔اسرائیلی حملوں میں65ہزار سے زائد گھر مکمل طور پر، 23اسپتال اور53طبی مراکز بھی تباہ ہوچکے ہیں۔اسرائیلی فوج نےحملے کرکے102ایمبولینسز کو نشانہ بنایا۔