بھٹکل 13 جنوری (ایس او نیوز) جماعت المسلمین بھٹکل کا سالانہ جلسہ مورخہ 12 جنوری بعد نماز عشاء جامع مسجد میں منعقد ہوا جس میں ذمہ داران نے اتحاد واتفاق پر زور دیتے ہوئے کہا کہ اجتماعیت ہوگی تو اللہ کی مدد اُترے گی۔ایک طرف قاضی جماعت المسلمین مولانا عبدالرب خطیب ندوی تو دوسری طرف جامع مسجد کے خطیب مولانا عبدالعلیم خطیب ندوی نے خطاب کرتے ہوئے کہا کہ اتحاد و اتفاق کسی بھی قوم وملت کا قیمتی سرمایہ اور اس کے تحفظ و بقا کا ضامن ہوا کرتا ہے جو قوم اتحاد و اتفاق اور اجتماعیت و یکجہتی سے بہرہ ور ہوتی ہے اور اس دولت سے مالا مال ہوتی ہے وہی قوم اور ملت زمانہ میں پنپتی ابھرتی نکھرتی اور عروج و بلندی کی منزلیں طے کرتی ہے۔ اس سے وہ اپنے وجود اور اپنی حیثیت کو باقی رکھتی ہے ۔ قرآن و حدیث میں ہمیں جابجا اجتماعیت اور اتحاد و اتفاق پر زور دیا گیا ہے اور اختلاف و انتشار سے بچنے اور اس دور رہنے کی تاکید کی گئ ہے ۔ مولانا عبدالرب ندوی نے اپنے خطاب میں محکمہ شرعیہ کی اہمیت اور اس کی ضرورت پر بھی زور دیا۔
جلسہ کا آغاز عمر بشیر دامداابو کی تلاوت کلام پاک سے ہوا، صُحیم خان نے نعت پاک پیش کی۔جماعت کے نائب صدر مولانا طلحہ رکن الدین ندوی نے استقبالیہ پیش کیا۔ جماعت کے جنرل سکریٹری مولوی محمد حُسین جوکاکو ندوی نے سالانہ رپورٹ پیش کیا، محاسب جناب محمد صادق پلّور نے حساب وکتاب پیش کیا، اس موقع پر اراکین کو سوالات کا موقع فراہم کیا گیا تھا، اطمینان بخش جوابات کے بعد رپورٹ اور حساب کتاب کو منظور ی دی گئی۔
مولانا الیاس جاکٹی ندوی نے دو جماعتوں کو ایک کرنے کے تعلق سے ہورہی میٹنگوں کے تعلق سے معلومات فراہم کیں اور بتایا کہ کام آگے بڑھ رہا ہے۔ جیسے جیسے کام مزید آگے بڑٖھے گا، عوام الناس کو اس تعلق سے جانکاری فراہم کی جائے گی۔
جماعت المسلمین کے صدر جناب ایس پی شفیع (عرف ماسٹر شفیع) نے صدارت کی۔مولانا شعیب ائیکری ندوی نے نظامت کے ساتھ اخر میں کلمہ تشکر پیش کیا اور مولانا عبدالرب خطیب ندوی کی دُعا پر جلسہ برخواست ہوا۔