وجئے پورہ: مریضہ کو لے جانے والی ایمبولینس کی ٹریکٹر سے ٹکر۔ حاملہ خاتون سمیت رحم میں پلنے والا بچہ بھی جاں بحق
وجئے پور 09 دسمبر(ایس او نیوز): حاملہ خاتون کو لے جانے والی 108 ایمبولینس سڑک کے کنارے کھڑے ٹریکٹر سے ٹکرا گئی جس کے نتیجے میں حاملہ خاتون سمیت اُس کے رحم میں پلنے والے بچہ کی بھی موت واقع ہوگئی۔ حادثہ تالیکوٹے پولس تھانہ حدود میں سنیچر کو پیش آیا۔
مہلوک حاملہ خاتون کی شناخت بھاگیہ شری راوتپّا پرنّاور (19) کی حیثیت سے کی گئی ہے۔ پتہ چلا ہے کہ تالی کوٹے تعلقہ کے ناودگی گاؤں کی بھاگیہ شری کی شادی ڈیڑھ سال قبل راتپّا کے ساتھ ہوئی تھی۔ بھاگیہ شری اپنی پہلی ڈیلیوری کے لیے اپنے گھر گئی تھی، آج جب درد شروع ہوا تو اسے اس کے گھر نوادگی سے تالی کوٹے کمیونٹی اسپتال لایا گیا۔ جب یہاں اس کی صحت بگڑنے لگی تو ڈاکٹروں کے مشورے پر ضلعی اسپتال منتقل کیا جارہا تھا جس کے دوران یہ حادثہ پیش آیا۔
حادثے میں خاتون اوراس کے پیدا ہونے والے بچے کی موت کے ساتھ ساتھ ایمبولنس پر سواردو نرس اور ایک اسسٹنٹ اسٹاف زخمی ہوگئے ہیں جنہیں ضلعی اسپتال میں داخل کیا گیا ہے۔
تالی کوٹے پولس تھانہ میں معاملہ درج کیا گیا ہے۔
